24 января 2017 г.
Тăвăш Юнтапа ялĕнчи Лидия Егоровăн чăнах та пуçа усса ларма вăхăт çук. Ир тăрать те тытăнать ал ĕçĕпе аппаланма. Унăн пÿртне кĕрсен тĕлĕнсе каймалла. Тĕртнĕ, çыхнă, тĕрленĕ ал ĕçĕсем куçа илĕртеççĕ.
Çав вăхăтах вăл Тăвăш Юнтапа клубне юрлама та çÿрет. Хăйĕн илемлĕ сассипе халăха савăнтарать. Сцена çине тухма ятарласа чăваш çи-пуçне те çĕлеттерчĕ. Тĕрлĕ конкурсра хастарлăхпа палăрать Лидия Егорова. Вĕсене хутшăнса тĕрлĕ Хисеп хутне те сахал мар тивĕçнĕ. Пушă вăхăтра вара Роза Федотовăпа иккĕшĕ йĕлтĕр çине тăраççĕ, сывлăхне çирĕплетеççĕ.
Унăн ырă кăмăллăхĕпе хастарлăхĕ пуриншĕн те тĕслĕх вырăнĕнче. Вăл йывăрлăхсем умĕнче нихăçан пуçа усман, малалла талпăннă. Лидия Егоровăна ял-йышра та хисеплеççĕ.
В.ГЕРАСИМОВ, Тăвăш Юнтапа клуб ертÿçи.