27 января 2017 г.
Январĕн 21-22-мĕшĕнче Мускавра «Единая Россия» партин XVI отчетпа суйлав съезчĕ иртнĕ. Унăн ĕçне Чăваш Республикин Пуçлăхĕ Михаил Игнатьев ертсе пынипе чăваш делегацийĕ те хутшăннă. Вĕсен йышĕнче Элĕк районĕнчи Ураскилт вăтам шкулĕн директорĕ Владислав Миронов пулнă.
Съезд делегачĕсем пĕр саслăн пулса Дмитрий Медведева тепĕр пилĕк çуллăх парти председательне суйланă. Вĕсем çавăн пекех Аслă Канашăн председателĕн Борис Грызловăн тата Генеральнăй Канашăн секретарĕн Сергей Неверовăн полномочийĕсене çирĕплетнĕ. Генеральнăй Канаша хальхинче Чăваш Енрен иккĕн суйланнине палăртмалла. Вĕсем: РФ Патшăлăх Думин депутачĕ Алена Аршинова тата Елчĕк районĕн вырăнти уйрăм секретарĕ Николай Миллин.
Съезда уçнă май парти председателĕ Дмитрий Медведев Раççей Президенчĕн Владимир Путинăн саламне вуласа панă. Дмитрий Анатольевич делегатсем умĕнче партин пилĕк çулхи ĕç-хĕлне, 2016 çулхи суйлав кампанине, «Единая Россия» фракцин Патшалăх Думинчи ĕçĕн малтанхи уйăхĕсене пĕтĕмлетнĕ, суйлав умĕнхи программăна тата Президент Çырăвне пурнăçламалли çулсене сÿтсе явнă. «Единая Россия» çĕршывра тăвакан пĕтĕм йышăнушăн яваплă, мĕншĕн тесен суйлавра партишĕн сасăлакан çынсем вăл хăйсен интересĕсене хÿтĕлессине шанаççĕ», -тенĕ парти председателĕ.
Чăваш Республикин Пуçлăхĕ Михаил Игнатьев «Единая Россия» проекчĕсем регионсенче ăнăçлă пурнăçланнине палăртнă. Программăн çĕнĕ енĕсем çынсен пурнăç пахалăхне лайăхлатма, çамрăксене хăйсене туллин кăтартма пулăшнине асăннă. «Съездăн площадкисенче федераци министрĕсем хутшăннипе малашлăх аталанăвĕн çул-йĕрне сÿтсе яврăмăр, вĕсем федераци тата регионсен бюджечĕсенче те вырăн тупнă», - пĕлтернĕ Михаил Васильевич.
Владислав МИРОНОВ, съезд делегачĕ:
Съезд çÿллĕ шайра иртрĕ. Пĕрремĕш куннех 7 дискусси площадки ĕçлерĕ. Вĕсенче кашнинче çĕршыв аталанăвĕн çивĕч ыйтăвĕсене сÿтсе яврĕç. Эпĕ «Вĕренÿ тата культура» темăпа иртекен 4-мĕш площадка ĕçне хутшăнтăм. Кунта Раççей Вĕренÿ Министрĕ Ольга Васильева тата Раççей Культура Министрĕ Владимир Мединский тухса калаçрĕç. Сăмах ял шкулĕсенче спортзалсене юсасси, çĕнĕ шкулсем çĕклесси пирки пычĕ, çавăн пекех патриотизм туйăмне аталантарасси, çынсен культура шайне çĕклесси те тухса калаçакансен сăмахĕнче хăйĕн вырăнне тупрĕ.
М.МИХАЙЛОВА.