31 января 2017 г.
РФ промышленность тата суту-илÿ министрĕ Денис Мантуров Чăваш Енре асăннă ведомствăн промышленность Координаци канашĕн ларăвне ирттернĕ. Раççейре апат-çимĕç машиностроенийĕн ыйтăвĕсене пăхса тухнă ларăва РФ Президенчĕн Атăлçи тăрăхĕнчи полномочиллĕ представителĕ Михаил Бабич, Чăваш Ен Пуçлăхĕ Михаил Игнатьев, çĕршыври профильлĕ ведомствăсен ертÿçисем хутшăннă.
Ларура чăваш предприятийĕсем те ырă сăмаха тивĕçнĕ. Калăпăр, «Чувашторгтехника» хăй кăларакан оборудованин 35 процентне чикĕ леш енне ăсатать. Çакăн пек аталанса пыракансене патшалăх май пур таран пулăшасса пĕлтернĕ Денис Мантуров. Министр Чăваш Ене регионти чемпионпах танлаштарнă. «Регионта Промышленность фондне туса хурас енĕпе Санкт-Петербург малта пыратчĕ - вĕсен калăпăшĕ 1 млрд тенкĕпе танлашатчĕ. Чăваш Ен çак кунсенче йышăнупа савăнтарчĕ - регионта çакăн пек Фонда аталантармашкăн 1,6 млрд тенкĕ хывасса пĕлтерчĕ», - тенĕ вăл.
Хăнасем «Шупашкар-Арена» Пăр керменĕнче пулса курнă - унта 40 ытла предприяти хăйсен продукцийĕн куравне йĕркеленĕ. Денис Мантуров республикăри промышленность предприятийĕсен аталанăвне пысăк хак панă.