28 февраля 2017 г.
Иртнĕ кунсенче Чăваш Сурăмĕнчи Культура çуртне шахмата юратакансем йышлăн пухăнчĕç. Вĕсем «Новый путь» ял хуçалăх предприятийĕн куçса çÿрекен Кубокне çĕнсе илессишĕн йăлана кĕнĕ турнира хутшăнчĕç. Çавăн пекех ку хутĕнче ăна çывхарса килекен Çĕршыв хÿтĕлевçин кунне халалласа йĕркелерĕç. Турнирта 15 çын тата 5 команда хăйсен ăс-тăн çивĕчлĕхне тĕрĕслерĕç.
Мероприятие «Новый путь» хуçалăх ертÿçи И.Н.Игнатьев уçрĕ. Иван Николаевич турнира хутшăнакансене тав тунă май вăйăра ăнăçу сунчĕ. Ун хыççăнах хĕрÿ кĕрешÿ пуçланчĕ.
Командăсем хушшинче Элĕк ял тăрăхĕн команди (В.Владимиров, А.Иванов тата А.Сергеев) виççĕмĕш вырăна тухрĕ. А.Дмитриев, С.Соловьев, П.Ефимов вара «Новый путь» хуçалăх команди пулса вăййа хутшăнчĕç, иккĕмĕш вырăна тивĕçрĕç. Ехрамкасси ял тăрăхĕн команди вара шахмат вăййисенче чи вăйли пулнине иккĕмĕш çул çирĕплетсе пачĕ. В.Ефимовран, Р.Парамановран, С.Сорокинран тăракан ушкăн çĕнтерÿçĕ пулса черетлĕ хут «Новый путь» ял хуçалăх предприятийĕн куçса çÿрекен Кубокне тивĕçрĕ.
Уйрăм вăйăçсем хушшинче вара Ехремкассинчи Рэм Парамонова çитекенни пулмарĕ. Муркаш районĕнчи Тивĕшри Лев Краснов - иккĕмĕш, Элĕк салинчи Алексей Иванов виççĕмĕш вырăна тухрĕç. Çĕнтерÿçĕсене дипломсемпе, медальсемпе тата асăнмалăх парнесемпе чысларĕç.
Э.ЭЛИНА.