28 марта 2017 г.
Вутланти тĕп шкулта канмалли кунсем хаваслă иртрĕç. Сывлăхпа спорт кунĕнче кунта Амăшĕпе Ашшĕн çулталăкне халалланă мероприяти пулчĕ. Спорт уявне Ехремкасси ял тăрăхĕн пуçлăхĕ Вячеслав Ефимов тата Вутлан шкул директорĕ Людмила Никандрова уçрĕç.
Спорт уявĕ «Атте, анне тата эпĕ - спорт çемйи» хаваслă стартран пуçланчĕ. Унта Ивановсен, Мироновсен, Андреевсен çемйисем хутшăнчĕç. Çавăн пекех спорт кунне хутшăнакансем шашкăпа шахмат вăййисенче те ăмăртрĕç.
Унпа пĕрлех хĕрсен командисем волейболла вылярĕç. Карачура шкулĕн вĕренекенĕсем çĕнтерÿçĕ ятне илме тивĕçрĕç. Каччăсен командисем те вĕсенчен юлмарĕç. Хĕрÿ тупăшу хыççăн Ветерансен команди пĕрремĕш вырăна тухни паллă пулчĕ. Иккĕмĕш вырăнта - Татмăш ялĕн çамрăкĕсем, Юнтапара пурăнакансем виççĕмĕш вырăна çĕнсе илчĕç.