04 апреля 2017 г.
Ялта пурăнакан çыннăн сĕтел тулли апат-çимĕç. Ÿркенменнисем çеç ырлăх-пурлăха ÿстерсе пыраççĕ тенипе килĕшес килет. Çирĕккасси ялĕнче пурăнакансем юрă-ташăра кăна мар, кирек епле ĕçре те пуçарулăх кăтартаççĕ. Кунта килĕренех йышлă выльăх усраса тупăш тăваççĕ. Сăмахран, Галина Иванова, Лидия Федорова, Лидия Курцова, Нина Андреева, Иван Михеев, Валентина Степанова кил хуçалăхĕсенче сумалли 7-8 ĕне таранах. Чĕртавара патшалăха сутса тупăш тăваççĕ. Йышлă выльăх-чĕрлĕх усрама апачĕ те нумай кирлĕ. Апла пулин те Çирĕккассисем алă усса лармаççĕ. Çу кунĕсенче ытлă-çитлĕ выльăх апачĕ хатĕрлеççĕ, пай çĕрĕсемпе усă кураççĕ. Килĕрен тенĕ пекех мотоблок, трактор пур. Çавăнпа та утă-улăм çулса пуçтарса кĕртесси вĕсене йывăрлăх кÿмест.