04 апреля 2017 г.
Иртнĕ эрнере Элĕкри «Хĕлхем» спорт шкулĕнче район администрацийĕн пуçлăхĕн парнисене çĕнсе илессишĕн 20-мĕш хут иртнĕ республикăри бокс турнирĕ чăннипех те чи вăйлисене палăртрĕ.
Ăмăртăва республикăри тата ытти регионсенчи 85 çамрăк боксер хутшăнчĕ. Виçĕ кун хушшинче çамрăк спортсменсем хăйсен ăсталăхне кăтартрĕç.
2007, 2005-2006, 2003-2004, 2001-2002, 1998 тата аслăрах çулсенче çуралнисем, çавăн пекех Элита ушкăна кĕрекенсем çĕнтерÿçĕсен йышне лекессишĕн тупăшура вăй-халне шеллемерĕç. Кашни виçе категорийĕнче çĕнтерÿçĕсемпе призерсене палăртрĕç. Элĕк район чысне Даниил Оферкин (40 килограмм), Эдуард Маслов (36 килограмм), Кирилл Юртаев (48 килограмм), Даниэль Семенов (80 килограмм) çÿллĕ шая çĕклеме пултарчĕç, çĕнтерÿçĕсем пулса тăчĕç.
Çĕнтерÿçĕсемпе призерсене район администрацийĕн пуçлăхĕ Александр Куликов, ăмăртусен тĕп судйи Валерий Львов, «Хĕлхем» спорт шкулĕн бокс тренерĕ Владимир Гордеев парнесем парса хавхалантарчĕç.
Арина ВОНИФАТЬЕВА.