14 апреля 2017 г.
Санкт-Петербург хулинче терракт пулса иртни кирек хăçан та, ăçта та яланах сыхă пулмаллине тепĕр хут асăрхаттарать, пурин те тимлĕ пулмаллине çирĕплетет. Мăнкун умĕн тата Мăнкун уявĕнче Шупашкарти чиркÿсемпе храмсене халăх йышлă çÿрени паллă-ха. Ку чухне вĕсене хăрушсăрлăхпа тивĕçтересси те тĕп вырăнта пулмалла. Сергей Пушков протоиерей пĕлтернĕ тăрăх, çакна тĕпе хурса чиркÿсен алăкĕсем патĕнче металл шыракан тата ытти тĕрĕслев хатĕрĕсем вырнаçтарĕç. Куншăн вара кăмăлсăрланма кирлĕ мар, çак ĕçе пĕтĕмпех инкерен сыхланас тĕлĕшпе туса ирттереççĕ. Мăнкун уявĕ ячĕпе районти чиркÿсенче иртекен службăсенчи йĕркелĕхе те полици сотрудникĕсемпе пĕрлех ирĕклĕ халăх дружинин дружинникĕсем те сыхлĕç.
Пĕлме: Чăваш Ен Наци телевиденийĕ Мăнкун уявĕ ячĕпе ирттерекен службăна тÿрремĕнех курма май туса парать. Тÿрĕ эфир апрелĕн 15-мĕшĕнче 23 сехетре пуçланать. Ăна Чăваш митраполийĕн Пуçлăхĕ, Шупашкар тата Чăваш митрополичĕ Варнава ирттерет.