28 апреля 2017 г.
1986 çулхи апрелĕн 26-мĕшĕнче пулса иртнĕ Чернобыльти авари инкекне сирнĕ çĕре районтан 22 çын хутшăннă. Шел пулин те, вĕсен йышĕ çулсеренех чакса пырать. Халĕ 11-шĕ çеç пурăнать.
Чернобыль АЭСĕнче синкерлĕ авари пулнăранпа кăçал 31 çул çитрĕ. Унăн ахрăмĕ паянхи кунчченех тăсăлать. Халĕ пурăнакан «чернобылецсем» пурте тенĕ пекех сывлăх енчен хавшаççĕ. Сывлав, юн çаврăнăшĕ, вар-хырăм органĕсен, нерв тытăмĕн, шыçă чирĕсем нумайăшне нушалантараççĕ. Инкеке сирнĕ чух хÿтĕлев хатĕрĕсемпе усă курнă пулин те, радиаци тусанĕ çынсене хытах сиенленĕ. Вĕсене ун чухне нимĕнле медаль те, орден та кирлĕ пулман. Çамрăксем çĕршыв хушнине пурнăçланă.
Чернобыль аварийĕ пĕтĕм этемлĕхшĕн чĕре ыратăвĕ пулса юлнă. Инкеке сирме хутшăннă арçынсем тата тăлăх арăмсем апрелĕн 26-мĕшĕнче район администрацийĕн акт залне пухăнчĕç. Пĕтĕм Раççейри инвалидсен обществин Чăваш Республикинчи организацийĕн Элĕкри уйрăмĕн председателĕ Геннадий Деомидов пухăннисемпе «çавра сĕтел» ирттерчĕ. Район администрацийĕн вĕренÿ пайĕн начальникĕ Петр Павлов, РФ Пенси фончĕн Элĕкри уйрăмĕн начальникĕ Виктор Кротов, социаллă хÿтлĕх пайĕн начальникĕ Галина Григорьева Чернобыльти аварие сирме пулăшнисене тав сăмахĕ каларĕç. Пухăннисем пурнăçран вăхăтсăр уйрăлса кайнисене асăнса пĕр минут шăп тăчĕç, хыççăн чиркĕве кайса çурта çутрĕç. Культурăпа кану паркĕнче Чернобыльте пулнисене асăнса лартнă палăк умне чечек кăшăлĕ хучĕç.
Чернобыль аварийĕ кашнин пурнăçĕнче тарăн йĕр хăварнă. Патшалăх «чернобылецсене» май пур таран пулăшма тăрăшать. Чернобыльти инкеке сирме хутшăннисене социаллă хÿтлĕх пайĕ урлă çулсеренех сывлăха çирĕплетме пулăшу, çурт-йĕрпе коммуналлă пулăшусемшĕн çăмăллăх параççĕ. Унсăр пуçне Чăваш Республикин Сывлăх сыхлавĕ тата социаллă аталану министерстви урлă Чернобыльти аварие хутшăнса инвалида тухнисене сывлăха сиен кÿнĕшĕн тивĕçекен тÿлевпе тивĕçтереççĕ. РФ Пенси фончĕ урлă инкеке сирме хутшăннисем уйăхсерен укçа илеççĕ.
Вера МОРОЗОВА.