03 мая 2017 г.
Районти çур акине тухас умĕн техникăна йĕркене кĕртесси пысăк пĕлтерĕшлĕ. Çавна май ял хуçалăх предприятийĕсем кăна мар, ытти организацисем те çак тапхăрта техникăна тĕрĕслеве тăратаççĕ.
Акă апрель уйăхĕн вĕçĕнче района ĕçлĕ тĕлпулупа Чăваш Республикин Патшалăх техника надзорĕн инспекцийĕн начальникĕ Сергей Вязовский килсе кайрĕ. Вăл чи малтанах район администрацийĕн пуçлăхĕпе Александр Куликовпа тĕл пулчĕ. Вĕсем районта çурхи уй-хир ĕçĕсене ирттерес тата трактор-машинăна техника тĕрĕслевĕ витĕр кăларас ыйтусене пăхса тухрĕç. Çавăн пекех «Уйрăм çын» профилактика мероприятийĕ çинче те чарăнса тăчĕç.
Ун хыççăн Сергей Вязовскийпа Александр Куликов тата районти патшалăх техника надзорĕн инспекцийĕн начальникĕпе Константин Майоровпа районти ял хуçалăхпа экологи пайĕн начальникĕ Анатолий Прохоров «Алиководорстрой» хупă акционерлă обществăра пулчĕç.
Ертÿçĕсем техникăна пăхса тухнă хыççăн çакă паллă пулчĕ: организаци пурĕ 10 единица техникăна тĕрĕслеве тăратнă, вĕсенчен 8-шĕ техника тĕрĕслевĕ витĕр тухнă. Апла пулсан вĕсене техника тĕрĕслевĕ витĕр тухнине çирĕплетекен свидетельство параççĕ. «Алиководорстрой» çулран-çул техника тĕрĕслевĕ патне яваплăхпа пыни куç кĕрет, анчах та çитменлĕхсене те асăрхамасăр пулмарĕ. Çавăнпа та тĕрĕслеве тăратнă тепĕр 2 единица техникăна йĕркелесе çитерме акт çырнă.
Çакна та палăртса хăвармалла, кăçал районта пурĕ 954 единица техникăна регистрациленĕ. Вĕсенчен 220-шĕ (23 процент) - ял хуçалăх предприятийĕсемпе хресчен-фермер хуçалăхĕсенче. Çурхи уй-хир ĕçĕсене вара 146 трактора явăçтарма палăртнă.
А.СИЛИВЕСТРОВА.