05 мая 2017 г.
Чăваш Ен кăçал Пĕтĕм тĕнчери «Вилĕмсĕр полк» акцие пиллĕкмĕш хут хутшăнма хатĕрленет. Унăн тĕллевĕ - Тăван çĕршыв ирĕклĕхĕшĕн кĕрешнисен паттăрлăхне асра хăварасси. Çĕнтерÿ кунĕнче çамрăксем те, аслăрах çулхисем те - кăмăл пуррисем - вăрçăран таврăнайман е мирлĕ вăхăтра вилнĕ çĕнтерÿçĕ фронтовиксен сăн ÿкерчĕкĕсене йăтса урам тăрăх колоннăпа утса иртме пултараççĕ.
Çакнашкал акцисем çитĕнекен ăрăва çĕршыв историйĕпе тĕплĕнрех паллашма, тăшманпа çапăçма хутшăннă тăванĕсем пирки ытларах ыйтса пĕлме тата тĕрлĕ çĕрте информаци шырама хистеççĕ, вĕсен патриотизм туйăмне вăйлатаççĕ.
Пирĕн районта та асăннă акци çулсерен вăй илет. Элĕк салин урамĕпе аслисемпе танах шкул ачисем те тăванĕсен портречĕсене йăтса мăнаçлăн утаççĕ.