23 мая 2017 г.
Элĕкри «Хĕлхем» спорт шкулĕнче ачасен пултарулăхне аталантарас тата сывлăха çирĕплетсе вăхăта усăллă ирттерес тĕллевпе тĕрлĕ секци ĕçлет. Вĕсен шутĕнче футболла вылясси те. Ачасем хăйсен интересĕшĕн выляни кăна мар, пĕрмай тренировкăсене çÿресе тĕрлĕ йышши ăмăртусене хутшăнса малти вырăн йышăнассишĕн тăрăшни те çитĕнекен ăрăва палăртнă тĕллевĕсене пурнăçа кĕртсе пыма май парать. Анчах та тренерсенчен те ку чухне нумай килет. Владимир Трофимов тата Эрик Вонифатьев тренерсем ертсе пыракан футбол командисем республика шайĕнче иртекен ăмăртусене çулсерен хутшăнса малти вырăнсене çĕнсе илессишĕн тăрăшаççĕ.
Иртнĕ кунсенче Çĕнĕ Шупашкар хулинче футболла выляссипе «Сăран мечĕк» клубăн парнисемшĕн 2002-2003 çулта çуралнисен аслă ушкăнĕсем хушшинчи республика ăмăртăвĕсем вĕçленчĕç. Пирĕн районăн суйласа пухнă команди ăмăртусем умĕнхи пĕрремĕшпе иккĕмĕш раунчĕсенче мала тухрĕ. Пур вăйран тăрăшнипе пирĕн футболистсем республикăри ултă чи вăйлă команда йышне кĕчĕç. Виççĕмĕш раундра та Элĕксем тăваттăмĕш вырăна куçрĕç. Виççĕмĕш вырăншăн вара пирĕн команда Çĕмĕрлесемпе вылярĕ. Хĕрÿ те çивĕч ăмăртура Элĕкри çамрăк футболистсем 2:1 кăтартупа вĕсене çĕнтерчĕç. Çапла майпа пăхăр медале тивĕçрĕç.
А.ВОНИФАТЬЕВА.