26 мая 2017 г.
Тин кăна вун пĕрмĕшсемшĕн çĕнĕ вĕренÿ çулĕ пуçланнăччĕ, халĕ акă «Юлашки шăнкăрав» уявĕ çитрĕ. Кĕçех вĕсен экзаменсен тапхăрĕ пуçланать. Майăн 23-мĕшĕнче, ытларикун, Элĕкри вăтам шкулта вĕренекенсемпе вĕрентекенсем, ашшĕ-амăшĕ Элĕкри культура çурчĕ умĕнчи М.Е.Ефимов ячĕллĕ лапама пухăнчĕç. Çавăн пекех районти ытти шкулсенче те çак кун юлашки шăнкăрав янăрарĕ.
Çак савăнăçлă та, çав вăхăтрах хумхануллă уявпа вĕсене район пуçлăхĕ, шкул директорĕ Владислав Волков саламларĕ.
- Эпир пурте çакăнта сирĕнпе юлашки шăнкăрав сассине илтме пуçтарăнтăмăр. Юлашки шăнкăрав - шкултан вĕренсе тухса алла аттестат илнине кăна мар, çакă шкул саккинчен уйрăлакансемшĕн çĕнĕ пурнăç, тепĕр пысăк ĕç пуçланнине пĕлтерет. Нихăçан та, ниçта та ан хумханăр, яланах çирĕп пулăр. Ыранхи куна яланах хаваслă туйăмпа, çирĕп кăмăлпа кĕтсе илĕр. Пĕрремĕш классем сирĕн çине пăхса ăмсанса тăччăр, сирĕнтен ырă тĕслĕх илччĕр. Кирек хăш çулпа та малаллах утакан çĕнтерсе пырать. Çакна манса ан кайăр. Çавăнпа та сире çирĕп сывлăх, экзаменсенче ăнăçу сунатăп. Пирĕн шкул алăкĕ сире валли яланах уçă,- терĕ Владислав Константинович тăххăрмĕшсемпе вун пĕрмĕшсене аслă çул çине пилленĕ май.
Çавăн пекех район администрацийĕн пуçлăхĕн пĕрремĕш çумĕ Лидия Никитина вĕренекенсене те, ашшĕ-амăшне те уяв ячĕпе саламларĕ. «Сирĕн умăрта яваплă самант - экзаменсем, ун витĕр ăнăçлă тухма сунатăп. Пурнăçри йывăрлăхсем умĕнче çухалса ан кайăр, ун пек чухне сирĕнпе юнашар вĕрентекенсем, атте-анне, тус-юлташ пур. Вĕсем яланах пулăшса пырĕç», - терĕ Лидия Михайловна.
Хыççăнах шкул пурнăçне хастар хутшăннă тата тĕрлĕ конкурссемпе олимпиадăсенче çĕнтернĕ, призерсен йышне кĕнĕ тăххăрмĕшсемпе вун пĕрмĕшсене, вĕсен вĕрентекенĕсене чысларĕç, тав сăмахĕсем каларĕç.
Уяв программи малалла тăсăлнă май Элĕк ял тăрăхĕн пуçлăхĕн çумĕ Сергей Алексеев тата Элĕкри «Хĕлхем» спорт шкулĕн директорĕ Валерий Сергеев шкул пĕтерекенсене юлашки шăнкăравпа саламларĕç, экзаменсенче ăнăçу сунчĕç. Валерий Николаевич вун пĕрмĕшсене ГТО нормативĕсене ăнăçлă пурнăçланăшăн ылтăн медальсем пачĕ. Вĕсем Элĕк шкулĕнчен иккĕн: Нелли Львова тата Наташа Елизарова.
Вун пĕрмĕшсен пăлхану саманчĕ малалла тăсăлчĕ. Пĕрремĕш вĕрентекенсем - Тамара Чашкова тата Валентина Афанасьева хăйсем чи малтанах алăран тытса класа илсе кĕнине, вĕренÿре пирвайхи утăмсем тунине аса илсе паянхи яшсемпе хĕрсене малашнехи пурнăçра такăр çул сунчĕç. «Пурнăç кустăрми ялан тикĕс çулпа чупмасть вăл, çавăнпа та йывăрлăхсенчен ан хăрăр. Вĕрентекенсене манса ан кайăр. Çынна хисеплеме пĕлĕр, вара хăвăра та хисеп пулĕ. Мĕн ĕмĕтленни пурнăçа кĕрсе пытăр. Экзаменсене ăнăçлă тытăр. Сирĕн пурнăç çулĕ такăр пултăр», - терĕç вĕсем чĕререн тухакан сăмахĕсене каланă май. Ун хыççăн вун пĕрмĕшсене валли кĕçĕн классем хаваслă туйăм кĕртекен сăвăсем каларĕç. Хумханса тăракан хĕрсемпе каччăсене халалланă йĕркисем питех те вырăнлă пулчĕç. Пĕчĕккисем саламланă чухне аслисем те савăнчĕç.
Юлашки шăнкăрав сасси янăриччен вун пĕрмĕшсен класс ертÿçи сăмах илчĕ. Наталья Толмачевăшăн та паянхи уяв хумхануллă. Унăн хăйĕн юратнă вĕренекенĕсемпе сыв пуллашмалли самант çитет. Кун пек чухне куç шывланнине пытараймăн. Наталья Вячеславовна хăйĕн «тĕпренчĕкĕсене» экзаменсенче пысăк балсем пухма, суйланă профессие алла илме ăнăçу сунчĕ. Хăй çырнă сăввине вун пĕрмĕшсене халалланă чух вара йĕркисем уяври кашни çыннăн чĕрине пырса тиврĕç.
Юлашкинчен паянхи выпускниксен ашшĕ-амăшĕ сцена çине хăпарса педагогсене, пĕрремĕш вĕрентекенсене, шкул директорне тав сăмахĕсем каларĕç. Вун пĕрмĕшсем уява хатĕрленĕ юрри-ташшине кăтартрĕç. Çакă вара пуриншĕн те парне вырăннех пулчĕ. Вĕсем тÿпене тĕрлĕ тĕслĕ хăмпăсем яма та манмарĕç. Акă кĕтнĕ самант та çитрĕ. Кăçал юлашки шăнкăрава пама Нелли Львовăпа Александр Свистков тивĕçнĕ. Юлашки шăнкăрав сасси пурнăçăн çĕнĕ тапхăрĕ пуçланнине пĕлтерчĕ те ĕнтĕ. Эппин, ăнăçу сире выпускниксем!
Анжелика СИЛИВЕСТРОВА.