Публикации » Элĕк çамрăкĕсем Хусанти форума хутшăннă

26 мая 2017 г.

Сывă пурнăç йĕркине пăхăнасси - паянхи обществăн тĕп ыйтăвĕсенчен пĕри. Пирĕн кăмăл-туйăм та унранах килет. Çамрăксене физкультурăпа тата спортпа çывăхрах туслаштарас, сывă пурнăç йĕркине юратма вĕрентес тĕллевпе Раççейре пĕлтерĕшлĕ ĕç туса ирттереççĕ.

Хусанти патшалăх энергетика университетĕнче Атăлçи федераци округĕнчи вĕренÿ учрежденийĕсенчи чи пултаруллă та хастар студентсем вĕренÿ форумне хутшăннă. Вĕсен йышĕнче Элĕк вăтам шкулĕнчен вĕренсе тухнă, Чăваш патшалăх университечĕн химипе фармацевтика факультечĕн студенчĕ Сергей Иванов, Юнтапа шкулĕнче ăс пухнă, халĕ вырăс тата чăваш филологийĕпе журналистика факультетĕнче пĕлÿ илекен Анастасия Порфирьева та пур.

Çамрăксене физкультурăпа тата спортпа çывăхрах туслаштарас, сывă пурнăç йĕркине юратма вĕрентес тĕллевпе Раççейре курăмлă тата пĕлтерĕшлĕ ĕç туса ирттереççĕ. «Форум майăн 23-24-мĕшĕсенче «Спорт менеджменчĕ» тата «Спорт журналистики» икĕ тĕп лапамра иртрĕ. Унта Атăлçи федераци округĕнчи 100 хастар çамрăк хутшăнчĕ», - каласа пачĕç Настьăпа Сергей. Настя журналистика енĕпе тавракурăма ÿстернĕ пулсан, Сергей менеджментри çĕнĕлĕхĕсемпе паллашнă.

Çамрăксем ушкăнсем йĕркелемелли, тĕллевсене палăртса вĕсене пурнăçламалли, сывă пурнăç йĕркине пăхăнассинче студентсен спорт клубĕсен мĕнле ĕçсем туса ирттермелли ыйтусене пăхса тухса семинарсенче ăс-хакăла пуянлатнă. «Вĕренÿ форумĕнче ватерпол енĕпе олимп чемпионĕ, Раççей Федерацийĕн Патшалăх Думин депутачĕ Ирек Зиннуров тата ишессипе олимп чемпионĕ Яна Мартынова хутшăнчĕç. Вĕсем сывлăха мĕнле факторсем витĕм кÿнине тата сывă пурнăç йĕркине мĕнле тытса пымаллине каласа пани студентсемшĕн интереслĕ пулчĕ. Форума хутшăнни пурнăç çине урăх куçпа пăхтарать. Хамăн пурнăçа журналистикăпа çыхăнтарма шут тытнăран çак форум мана малашне те пулăшасса шанатăп», - форумри хăш-пĕр самантсемпе паллаштарчĕ Анастасия Порфирьева. Шел пулин те, студентсен хушшинче сывă пурнăç йĕркине пăхăнакансен йышĕ сахал пулнине пăшăрханса палăртрĕ хĕр.

Форум хăйне евĕрлĕхĕпе те уйрăлса тăнă. Студентсем лапамсенчи ĕçе кăна хутшăман, вĕсен ГТО нормативĕсене те пурнăçлама тивнĕ. «Форумра спорт çинчен ытларах калаçу пулчĕ. Çавăнпа та ушкăнсем йĕркелесе спорт ăмăртăвĕсем ирттерни - волейболпа футбол вăййисем выляни - пĕр-пĕрин хушшинчи туслăха çирĕплетме пулăшрĕ», - палăртрĕ Сергей Иванов. Форумăн пĕрремĕш кунĕнче Студентсене Хусанти паллă вырăнсемпе те паллаштарнă, экскурси ирттернĕ. Иккĕмĕш кун татах та интереслĕрех иртнĕ. Каччăсемпе хĕрсем ушкăнсем çине пайланса теорипе практика ыйтăвĕсене пăхса тухнă.

Форумра пĕр-пĕрин опычĕпе паллашни, çĕнĕ тус-юлташ тупни тĕллевсене пурнăçа кĕртме май панине те пытармарĕç хастар студентсем. Унта хутшăнакансем хăйсен проекчĕсемпе паллаштарнине те асăнса хăварчĕç Настьăпа Сергей.

Вера МОРОЗОВА.