20 июня 2017 г.
Хаçат юбилейĕ тĕлне конкурссем ирттересси пирки хамăр вулакансене пĕлтернĕччĕ. «Район хаçатне иккĕмĕш пурнăç парнеле» ал ĕçĕсен конкурсне вара пĕрремĕш ĕçсем килме те пуçларĕç.
Тĕрĕссипе, шкулсем çумĕнчи кану лагерĕсене çÿрекенсен кăмăлне кайрĕ эпир сĕннĕ конкурс. Иртнĕ эрнекун Элĕкри вăтам шкулта пĕрремĕш курав йĕркелерĕмĕр. Шкул фойинче куракансене тĕлĕнмелле ал ĕçĕсем тыткăнларĕç. Кунта чечекĕпе лĕпĕшĕ те пур, кимĕпе самолетне те манса кайман, хĕрачасен пĕчĕк кăна сумкине те питех чипер хатĕрлеме пултарнă. Çавăн пекех хутран чĕрсе çилĕмпе çыпăçтарнă композици – чей чашăкĕпе конфетсем чăн-чăн савăтах аса илтерчĕç.
Ĕçсене уйрăмшар та, ушкăнпа та хатĕрленĕ. Уйрăмах 2-мĕш отряд хатĕрленĕ «çурт» пурне те тĕлĕнтерчĕ. Ку ĕçпе ачасем кивĕ хаçатран та шедевр хатĕрлеме пултарнине ĕнентерсе пачĕç. Курав Элĕк шкулĕнче виçĕ кун ĕçлерĕ. Чи ăнăçлă ĕçсене вара редакци çуртне илсе килсе вырнаçтартăмăр. Кăмăл тăвакансем вĕсемпе пирĕн патра паллашма пултараççĕ.
Аса илтеретпĕр: конкурс малалла пырать. Интереслĕ ал ĕçĕсем кĕтетпĕр.
М.МИХАЙЛОВА.