27 июня 2017 г.
Ачан спорт аталанăвĕ çине шкулти условисем те витĕм кÿреççĕ. Çавăнпах районти вĕренÿ учрежденийĕсенчи спортзалсенче юсав ĕçĕсем ирттерме республика бюджетĕнчен укçа уйăраççĕ. Кăçал юсав ĕçĕсене Мăн Ямаш шкулĕн спортзалĕнче ирттерме палăртнă. Ăна валли пĕтĕмпе 972 пин тенкĕ укçа хывса хăварнă. Çак укçа-тенке чÿречесене улăштарнă, урай сарнă, туалетсемпе çăвăнмалли, хывăнса тăхăнмалли пÿлĕмсене юсанă тата пĕтĕмĕшле строительство ĕçĕсене ирттернĕ çĕре яраççĕ. Район бюджетĕнчен 97 пин тенкĕ спорт оборудованийĕсене туянма уйăрнă. Паянхи кун Мăн Ямашри спортзалта строительство ĕçĕсем малалла пыраççĕ. Ăна августăн 1-мĕшĕ тĕлне вĕçлеме палăртнă.
Пĕтĕмпе 2014-2016 çулсенче капиталлă юсав ĕçĕсене тăватă спорт обьектĕнче ирттернĕ. Элĕкри, Тавăтри, Чăваш Сурăмĕнчи тата Мăн Вылăри вăтам шкулсенчи спортзалĕсене хăтлăх кĕртнĕ те ĕнтĕ.