27 июня 2017 г.
Ял магазинĕ халăхшăн ĕçлени никамшăн та вăрттăнлăх мар. Чăваш Сурăм ялĕнчи магазинта тăрăшакансем те çынсен ыйтăвĕсене туллин тата вăхăтра тивĕçтерессишĕн ырми-канми тăрăшаççĕ. Магазина кĕрсе тухма та кăмăллă. Кунта яланах тирпейлĕ, таварсене сентресем çинче килĕшÿллĕн вырнаçтарнă.
Лариса Никоновăпа Елена Михайловская суту-илÿре чылай çул тăрăшаççĕ. Вĕсем тавар туянма пыракансене яланах ырă кăмăлпа кĕтсе илеççĕ, килĕшнĕ тавара суйласа илме пулăшаççĕ. Иртнĕ кунсенче магазинта Юлия Николаева ĕçлеме пуçланă. Çийĕнчех пĕр чĕлхе тупнă вăл ĕçтешĕсемпе. Аслисем вĕрентсе пыни кулленхи ĕçре пулăшасса шанать çамрăк сутуçă.
Чăвашсурăмсем ĕç кăтартăвĕсемпе лайăххисен шутĕнче. Лавккара тавар ассортименчĕ пуян пулнăран унта вăй хуракансемшĕн чăрмав çук. Апат-çимĕç продукцине кунсерен илсе килеççĕ. Çăкăр-батонпа вăхăтра тивĕçтерни те ял çыннисемшĕн паха. Халăх ял лавккине тăтăшах çÿренĕрен кăтартăвĕсем те савăнтараççĕ, плана тултарса пыни вара малалла ĕçлеме хавхалантарать.
Хамăр патра туса кăларнă продукци пурри темрен те паха. Ăна валли уйрăм сентре хатĕрленĕ. Унта çăкăр-батон, печени-пĕремĕк, варени, помидор-хăяр тата вун-вун продукци пур. «Халăх лавккана йышлă çÿрет. Акă çу кунĕсем çитрĕç те, ытларах строительство материалĕсем ыйтма пуçларĕç. Заказсем те йышăнатпăр. Халăха меллĕрех, çăмăлрах пултăр тесе ĕçе çĕнĕлле йĕркелени те хавхалантарать: калăпăшлă стройматериала килех çитерсе параççĕ», - каласа парать магазинта 17 çул тăрăшакан Лариса Никонова сутуçă. Суту-илÿ тытăмĕнчи тепĕр паха ĕçе те палăртмасăр май çук. Çу кунĕсем çитсен Чăваш Сурăм ял тăрăхĕнче пурăнакансем чăх-чĕп туянма заявкăсем те тăратаççĕ. Сиплĕ курăк, кивĕ хут пухакансемпе те ĕçлеççĕ. Эмел курăкне Анатри Хурасанта пурăнакан тивĕçлĕ канури Александр Васильев пуринчен нумай парать иккен. Шкул ачисем те мороженăй, канфет-премĕк туянмалăх курăк пухса килеççĕ.
Туслă та ĕçчен коллективра ĕç ăнса пытăр тесе тăрăшаççĕ сутуçăсем.
Вера МОРОЗОВА.