Публикации » Выльăх апачĕ хатĕрлеççĕ

04 июля 2017 г.

Симĕс ĕççи вăхăтĕнче ял хуçалăх предприятийĕсен хĕрÿ тапхăр пуçланать. Районти хуçалăхсем выльăх апачĕ хатĕрлессипе тимлесех ĕçлеççĕ. Паянхи куна нумай çул ÿсекен курăксене пурĕ 1550 гектар çулнă. Пĕтĕмпе хальлĕхе 1120 тонна (54 процент) утă хатĕрленĕ. Ку енĕпе «Колос», «Алмаз» обществăсем, Ю. Никифоров хресчен-фермер хуçалăхĕ тата ытти ял хуçалăх предприятийĕсем те уяр çанталăкра тăрăшсах вăй хураççĕ. Çавăн пекех хуçалăхсем сенаж-силос хывассипе те тимлеççĕ. Паянхи куна сенаж 3000 тонна хатĕрленĕ, силос 1500 тонна янтăланă. Ку ĕç «Новый путь» тата Ульянов ячĕллĕ хуçалăхсенче малалла пырать. Уй-хирти калчасене хурт-кăпшанкăпа çум курăк-ран имçамлас ĕçе вĕçленĕ. Кĕр тыррисене акма çĕр 678 гектар хатĕрленĕ.