04 июля 2017 г.
Анат Юлăш ферми - районта чи пысăк та вăйлă аталаннă фермăсенчен пĕри шутланать. Ÿсĕмлĕ ĕçлесе пыракан сĕт-çу комплексĕнче ĕç вĕресе кăна тăрать.
Иртнĕ кунсенче кунта сенаж хатĕрлессипе тăрăшнă. Уй-хиртен вĕтетнĕ курăк пĕр вĕçĕмсĕр килсе тăнă. Траншейăри симĕс массăна çийĕнчех пусăрăнтарса кирлĕ хутăшсене те сапса хăварнă. Кăçал сенажа тулăх,1000 тонна, хывса хăварма тĕллев лартнă. Ăна планран ытлашшипех хатĕрлеме пултарнă. Иртнĕ çул сенаж 832 тонна хывнă пулнă.
Кунта выльăхсене тутлăхлă апатлантараççĕ, вĕсен рационĕнче нумай çул ÿсекен курăксăр пуçне куккуруспа силос тата тĕрлĕ витаминлă хутăш кĕрет. Çавна май сăвăма ÿстересси те, пăрусене самăртасси те лайăх пулса пырать. Комплексра сăвакан ĕнесем 130 пуç шутланаççĕ, пăрусем - 300 пуç.
Унти выльăх-чĕрлĕхе пурĕ тăватă витере усраççĕ. Выльăхсен шутне ÿстерсе пынă май тепĕр вите те çĕклеме палăртнă. Паянхи куна çĕнĕ вите тума та пуçăннă ĕнтĕ. Ĕçсем кал-кал пулса пыраççĕ. Элĕкри «Тепловодоканал» организацирен тăххăрăн тимлеççĕ ку ĕçре.
Комплекс начальникĕнче 13 çул вăй хуракан Александр Орлов пĕлтернĕ тăрăх, витене октябрьте хута ямалла. «Унта пĕтĕмпе 70-80 пуç выльăх вырнаçĕ. Вăл шутра чупнă тынасем те çавăнтах пулĕç, вĕсемпе пĕрлех - пăруланисем те», - пĕлтерчĕ вăл.
Ферма территоринче çĕнĕ витесем лартаççĕ пулин те кунта тирпейлĕх хуçаланать. Условисем лайăх пулни ĕç тухăçлăхĕ çине те ырă витĕм кÿрет. Ун пек чухне ĕçлеме те кăмăллă. Вырăнти çулсене пĕтĕмпех асфальт сарса тухнă. Уçă пĕлĕт айĕнче çÿрекен картари выльăхсене те кирлĕ условисем туса панă. Ферма территорине кĕнĕ чухне чечексем ешернине курсан кăмăл тата та çĕкленет. Сăмах май, комплекс технологипе йĕркелĕхе пăхăнса ĕçлесе пырать. Выльăхсене кирлĕ пек пăхса усрасси тĕп вырăнта пулмалла та.
А.СИЛИВЕСТРОВА.