07 июля 2017 г.
Çулсеренех июль уйăхĕн иккĕмĕш вырсарникунĕнче Раççей почтин кунне паллă тăватпăр. Вăхăт иртет, йăла-йĕрке те улшăнать, апла пулин те почта çыхăну тытăмĕнче тăрăшакансем хăйсен принципĕсене улăштармаççĕ. Унчченхиллех килсене хаçат-журнал, çырусем çитереççĕ, пенси укçипе пособисем валеçеççĕ. Чи пĕлтерĕшли вара ку чухне - çынсене савăк кăмăлпа йăл кулă парнелени.
Ĕнер районти почта çыхăну уйрăмĕн заведующийĕсемпе почтальонĕсем Элĕкри ача-пăча библиотекине пухăнчĕç.
- Пĕтĕмĕшле илсен, Чăваш Республикинчи почта çыхăнăвĕн федераци управленийĕн Çĕмĕрлери почтамчĕ - «Раççей Почти» Федерацин патшалăхăн унитарлă предприятийĕн филиалĕ 2016 çулта ĕçе лайăх кăтартусемпе вĕçленĕччĕ. Республикăра малтисен йышĕнче пултăмăр. Ку вара пурин çитĕнĕвĕ те. 2017 çулхи пĕрремĕш çурçулти ĕç кăтартăвĕсемпе вăтаммисен шутĕнче. Хăш-пĕр енĕпе малтисен ретĕнче пулсан, тепĕр çĕрте палăртнине пурнăçласа çитерейместпĕр. Ку вара çĕнĕ программăсем алла илнипе ăнланманлăхсем сиксе тухнипе те, техника тĕлĕшĕнчен кăлтăксем пулнипе те çыхăннă, - ĕç-хĕл çинче кĕскен чарăнса тăнă май палăртрĕ Çĕмĕрлери почтамт начальникĕ Сергей Новичков.
Уява пухăннă пек чухне куллен почта çыхăну уйрăмĕсем умне тухса тăракан çивĕч ыйтусене те хускатмасăр иртеймерĕç. Нумай чухне шăп та шай кадрсем çитменни ĕçе тивĕçлĕ шайра пурнăçлама ура хурать те. Вырăнсенче лайăхрах шырасан ĕçлес шутлисем те тупăнаççĕ, анчах та пĕчĕк шалупа камăн-ха куллен çакăн пек яваплăха хăй çине илес килтĕр; Сергей Николаевич ертÿçĕ те почта тытăмĕнче ĕçлекенсен шалăвне тахçанах хăпартманнине асăнчĕ. Çавăнпа та çак ыйтăва çÿлте ларакансем патне те çитернĕ. Чăваш Республикинчи почта çыхăнăвĕн федераци управленийĕн Çĕмĕрлери почтамтăн начальникĕ палăртнă тăрăх, кăçал çулталăк вĕçлениччен ку тĕлĕшпе улшăнусем пулас шанчăк пуррине пĕлтерчĕ.
- Эпир кулленех çынсен тĕрлĕ ыйтăвне тивĕçтеретпĕр. Ĕçĕн ытларах пайне техника хатĕрĕсемпе пурнăçлатпăр. Пытарма кирлĕ мар ĕнтĕ, чылай çĕрте вĕсем те кивелсе çитнĕ, вĕсене çĕнетессипе те ĕçлемелле. Çавăнпа та ку ĕçе те куçран вĕçертмĕпĕр.
Ертÿçĕ нимĕнле йывăрлăхсене пăхмасăр палăртнине пĕтĕмĕшле пурнăçласа пыракан почта çыхăну уйрăмĕн заведующийĕсене Хисеп хучĕсемпе чысларĕ. Надежда Алексеева (Ураскилт), Анжелика Кондратьева (Шĕмшеш), Инга Порфирьева (Тавăт), Любовь Петрова (Элĕк), Эмма Александрова (Урпаш), Ольга Томашова, Ирина Тимофеева почтальонка (Юнтапа), Валентина Романова (Мăн Вылă), Алина Сорокина (Мăн Этмен) тивĕçрĕç çак хисепе. Элĕкри почта çыхăну уйрăмĕн операторне Светлана Павловăна, Чăваш Сурăмĕнчи Венера Александрова заведующине тата Вутланти Ираида Петрова почтальонкăна Раççей Почтин Тав хучĕпе чысларĕç.
Уяв тени хăнасăр мĕнле пултăр-ха. Районти почта çыхăну уйрăмĕн ĕçченĕсене район администрацийĕн пуçлăхĕн социаллă ыйтусемпе ĕçлекен çумĕ П.Павлов та саламларĕ. «Почта обществăн социаллă, производствăлла ифраструктурăн уйрăлми пай шутланать. Тĕрлĕ пичет кăларăмĕсене вулакан патне çитернипе пĕрлех информаципе коммуникаци пулăшăвне те кÿрет. Паян Раççей Почти хăйĕн клиенчĕсене тĕрлĕ енлĕ пулăшу парать. Çавăнпа та вăл куçа курăнман, апла пулин те çирĕп «çиппе» пире пурне те çыхăнтарса тăрать. Хастарлăх тата паянхи çĕнĕ йышши технологисемпе усă курни почта çыхăну уйрăмĕн коллективне профессире татах та пысăкрах çитĕнÿсем тума пулăшасса шанатпăр», - терĕ хăйĕн сăмахĕнче Петр Петрович. Ехремкасси тата Урпаш почта çыхăну уйрăмĕсен заведующийĕсене Зоя Михайловăпа Эмма Александровăна тата Тавăтри Валентина Агафонова почтальонкăна район администрацийĕн Хисеп тата Тав хучĕсемпе чысларĕ. Кĕçĕн Тăванти Почта çыхăну уйрăмĕн почтальонки Светлана Платонова «Раççей Почти» профсоюз организацийĕн Тав хучĕпе укçан премие тивĕçрĕ.
Ку чухне эпир те хаçатçăсем çак уявран аякра пăрăнса юлаймастпăр. Пирĕн ĕç-хĕл почта çыхăну уйрăмĕн ĕçченĕсенчен те сахал мар килет. Район хаçатне вулакан патне вăхăтра çитерессишĕн шăп та шай вĕсем ырми-канми тăрăшаççĕ те. Вырăнсенче 2017 çулхи иккĕмĕш çур çуллăхра та вулакансен йышне сыхласа хăварнă, ÿстернĕ почта çыхăну уйрăмĕсем пурри вара пушшех те савăнтарать. Вĕсен шутне Чăваш Сурăм, Мăн Этмен, Ярхуньушкăнь, Тени, Юнтапа почтисене кĕртмелле. Асăннă почта çыхăну уйрăмĕсен заведующийĕсемпе почтальонĕсене «Пурнăç çулĕпе» район хаçачĕн тĕп редакторĕ Марина Леонтьева тав турĕ. Хисеп хучĕ тата парне парса чысларĕ. Сăмахăма вĕçленĕ май, районти почта çыхăну тытăмĕнче тăрăшакансене кашнине пысăк тав сăмахĕ калатпăр.
Хăвăра шанса панă ĕçе тулли кăмăлпа пурнăçланăшăн чĕререн тав тăватăп, - саламларĕ Сергей Николаевич Новичков.
Эльвира КУЗЬМИНА.