07 июля 2017 г.
Кашни çын пурнăçĕнче тĕп вырăнта çемьепе, юрату тата шанчăклăх тăрать. Вĕсемсĕр пурнăç пĕлтерĕшĕ те çук. Шăп та шай çак сăмахсем ĕнтĕ ĕмĕр тăршшĕпех упăшкипе арăмне, ачисене пĕр тĕвве пĕрлештерсе тăраççĕ. Çак шухăша Чăваш Сурăм тăрăхне тухсан Мăн Шĕвĕш ялĕнче пурăнакан Валентина Филиппова палăртрĕ. Июлĕн 5-мĕшĕнче тăхăр теçеткене пусăмланă кинемей мăшăрсем хушшинче çеç мар, аслисемпе ачасем хушшинче те шанчăклăх хуçаланмаллине пĕлтерчĕ. Çакна вĕсен çемйинче яланах тĕпе хунă. Çавăнпа та арçын хĕрарăма, ача-пăча аслисене хисеплесси тĕп вырăнта пулнă та, пулать те.
- Мĕн пĕчĕкренех атте-анне сăмахĕнчен иртмен эпир. Халĕ те çывăх çын каланине ан итле-ха; Самантрах ятласа илме пултарать вăл, - куларах пĕлтерет чи кĕçĕн хĕрĕ Лариса Михайловна.
Кил хуçи арçынĕ, Михаил Архипович, ача-пăча вак чух сÿс-кантăр заводĕнче, каярахпа Элĕкри çăкăр заводĕнче директорта тата ытти яваплă ĕçсенче тăрăшнă. Валентина Филипповна Мăн Шĕвĕшри пуçламăш шкулта 4 класс çеç вĕреннĕ. Тăван хуçалăхра ĕçлесех ĕмĕрне ирттернĕ. Хĕрарăм пуççăн та Мăн Шĕвĕшри сысна фермине тăвас ĕçе хутшăннă. Çавăн чухне ĕнтĕ каменщик профессине хăйне тĕллĕн алла илнĕ те. Ĕçри хастарлăхшăн чылай медале тивĕçнĕ тыл ветеранĕ.
- Анне хуçалăх ĕçĕнчен юлмасчĕ. Утçи тапхăрĕнче аттепе иккĕшĕ ирхине тата каçхине курăка çулса хăваратчĕç, ăна типĕтесси пирĕн ĕç пулнă. Килти ытти ĕç-пуçа та сахал мар пурнăçланă, - ачалăхне аса илсе калаçăва хутшăнать Мефодий Архипов. Пĕчĕклех ĕçе хăнăхса, яваплăха туйса ÿснĕ. Пĕр-пĕриншĕн яланах тĕрев пулнă. Çавăнпа та ачасем хушшинче çулсем кайнăçемĕн ку туртăм ÿссе çеç пынă. Шкул пĕтерсен Елена хĕрĕ аслă шкулта педагог профессине алла илнĕ. Мĕн тивĕçлĕ канăва тухичченех вăл Тени шкулĕнче директор çумĕнче тăрăшнă. Ăна кура Мефодий шăллĕ те аслă пĕлÿ илнĕ. Чăваш патшалăх архивĕнче, Чăваш Республикин Пуçлăхĕн Администрацийĕнче ĕçленĕ. Ял хуçалăх академийĕнче агроном специальноçне алла илнĕ Меркурий ывăлĕн кун-çулĕ вара ирех татăлнă.
Лариса хĕрĕпе Валерий кĕрÿшĕ паян Валентина Филипповăшăн уйрăмах пысăк тĕрев вырăнĕнче. 16 çул каялла Михаил Архипович вилнĕ хыççăн вĕсем патĕнче хÿтлĕх тупнă. Канмалли кунсемпе уявсенче 7 мăнукĕпе 10 кĕçĕн мăнукĕ тăтăшах килсе çÿреççĕ.
90-ри Валентина Филиппова вара çулĕсем пур пулин те ахаль ларма юратмасть-ха. Пÿрт-çуртра вак-тĕвек ĕçсене пурнăçлать. Кĕнекесем, «Пурнăç çулĕпе» хаçата вулама кăмăллать.
Э.ЭЛИНА.
Ĕнер Шупашкар хулинче Чăваш патшалăх филармонийĕнче Çемье, юратупа шанчăклăх кунне халалласа пысăк мероприяти иртнĕ. Унта Элĕк район делегацийĕ те хутшăннă. Чăваш Республикин Пуçлăхĕ Михаил Игнатьев нумай çул пĕрле пурăнакан мăшăрсене «Юратупа шанчăклăхшăн» орденпа чысланă. Пирĕн районтан çак хисепе Тури Вылари Николай Кононовичпа Дина Ивановна Потрикеевсем тивĕçнĕ. Вĕсем 60 çул пĕрле килĕштерсе пурăнаççĕ. Çавăн пекех паян Элĕкри культурăпа кану центрĕнче Çемье, юратупа шанчăклăх кунне халалласа мероприяти иртет.