11 июля 2017 г.
Хĕсметре пулнисемшĕн - çар служби пурнăçри чи лайăх урок пек асра юлнă. Çар пурнăç тĕшшине, туслăх мĕн иккенне аванах ăнланма пулăшнине палăртаççĕ салтак пăттине тутанса курнисем. Кунта çуралнă туслăх вара яланлăхах. Сăмахран, «Пограничниксен пĕрлĕхĕ» обществăлла организацийĕ тĕрлĕ çулсенче пограничниксен çарĕсенче службăра тăнă, халĕ республикăн тĕрлĕ кĕтесĕнче пурăнакансене пĕрлештерсе тăрать. Çакă вара хут çинче анчах мар-ха. Тăтăшах пухăнаççĕ асăннă пĕрлĕхе кĕрекен ĕнерхи салтаксем.
Июлĕн 8-мĕшĕнче, акă, Вăрнар поселокĕнче Чăваш Республикинчи пограничниксен службин ветеранĕсен йăлана кĕнĕ 5-мĕш слечĕ иртнĕ. Унта Шупашкар хулин, Вăрнар, Элĕк, Патăрьел, Йĕпреç, Комсомольски, Хĕрлĕ Чутай, Елчĕк, Муркаш, Етĕрне, Канаш, Çĕмĕрле районĕсен командисем хутшăннă.
Элĕк районĕнчи пограничниксен пĕрлĕхĕн председателĕ - районти тĕрĕслевпе шутлав органĕн председателĕ Борис Степанов, Чăваш Сурăм вăтам шкулĕнче физкультура урокĕсене вĕрентекен Константин Громов Патăрьел, Комсомольски, Елчĕк районĕсенчи юлташĕсемпе «Кăнтăр застави» пĕрлехи команда йĕркелесе тĕрлĕ ăмăртăва хутшăннă. Волейболла выляса 3-мĕш вырăна, пĕрремĕш медицина пулăшăвĕ парассипе - 2-мĕш, Калашников автоматне сÿтсе пуçтарассипе 2-мĕш вырăнсене тухнă. Пĕтĕмĕшле кăтартусемпе вара «Кăнтăр застави» пĕрлехи команда 2-мĕш вырăна тухнă.
Э.ЭЛИНА.