01 сентября 2017 г.
2017 çула Раççейре Экологи çулталăкĕ тесе палăртнă. Çакна шута илсе сентябрĕн 2-мĕшĕнчен пуçласа 30-мĕшĕччен çĕршывра Пĕтĕм Раççейри «Симĕс Раççей» экологи субботникĕ ирттерме палăртнă. Ку вăл массăллă экологи субботникĕ шутланать.
Субботник «Пурте пĕрле çĕршыва тасатма!» тĕллевпе иртет. Унăн тĕп тĕллевĕ - граждансене çут çанталăка сыхлама вĕрентесси, волонтер ĕçне вăйлатасси. Кăçалхипе вăл Раççейре пиллĕк-мĕш хут иртет. Чăваш Ен унта иккĕмĕш хут хутшăнать. Çак канмалли кунсенче çĕршывра урамсене çÿп-çапран тасатма тухĕç. Ырă пуçарăва йĕркелекенĕ - «Симĕс Раççей» общество юхăмĕ.
Акци пынă вăхăтра республикăри парксенче, скверсенче, аллейăсенче тирпей-илем кĕртĕç. Вĕренÿ учрежденийĕсенче вара çут çанталăка хÿтĕлессипе çыхăннă темăпа уроксем иртĕç. Çак акцие Элĕк районĕ хастар хутшăнать. Районти кашни учрежденипе организаци умĕнче хăтлăх кĕртĕç, ялсенчи урамсене кирлĕ мар ăпăр-тапăртан тасатĕç. Тăван тавралăх куçа илĕрттĕр тесен «Симĕс Раççей» акцие пурин те хастар хутшăнмалла.
В.НИКИФОРОВА.