05 сентября 2017 г.
Сентябрĕн 3-мĕшĕнче 13 çул каялла Бесланта теракт пулса иртнĕччĕ. Вăл инкек тÿснисен шучĕпе тĕнчери чи пысăкки пулчĕ. Унтанпа чылай çул иртнĕ пулин те Раççейре пурăнакан мĕнпур çын чĕринче халĕ те йăшкать-ха çак суран. Çавăнпа та çулсеренех Бесланта инкек тÿснисене асăнса астăвăм акцийĕсем иртеççĕ. Асăннă мероприятие кăçал И.Я.Яковлев ячĕллĕ Элĕкри вăтам шкул та хутшăнчĕ. Сентябрĕн 3-мĕшĕнче кунти шкулта ĕçлекен педагогсем, тĕрлĕ классенче пĕлÿ илекен ачасем акт залне йышлăн пухăнчĕç.
- Аса илтеретĕп, 2004 çулхи сентябрĕн пĕрремĕшĕнче террористсем унти 1-мĕш №-лĕ шкула ярса илнĕ, спорт залне йĕри-тавралла мина хурса тухнă, унта 1200 çынна заложника илнĕ. Вĕсен йышĕнче вĕренекенсемпе вĕрентекенсем, ашшĕ-амăшĕпе пĕрле Пĕлÿ кунĕн уявне килнĕ пĕчĕк ачасем, аслă çулсенчи çынсем те пулнă. Боевиксем Чечен Республикинчен Раççей çарĕсене илсе тухма ыйтнă. Заложника илнĕ арçынсене террористсем хăйсене хирĕç тăрасран шикленсе тÿрех персе вĕлернĕ. Ыттисен те çак тапхăрта сахал мар тÿсме тивнĕ. Аслисене çеç мар, ачасене те пĕр тумлам та шыв ĕçтермен, - ун чухне пулса иртнĕ пĕтĕмĕшле лару-тăрупа кĕскен паллаштарчĕ Владислав Волков шкул директорĕ.
Сентябрĕн 3-мĕшĕнче мина çурăлса кайнă, çакăн хыççăн ĕнтĕ право хуралĕн органĕсем штурм пуçланă. Асăннă инкекре 334 çын вилнĕ, вĕсенчен - 186 ача, 17 вĕрентекен пулнă. 800 ытла çын аманнă. Федерацин хăрушсăрлăх службин «Альфа» тата «Вымпел» отрячĕсем те çухату тÿснĕ, 10 сотрудникăн пурнăçĕ вăхăтсăр татăлнă, 41-шĕ йывăр аманнă. Çавăн пекех Чрезвычайлă лару-тăру министерствин 2 сотрудникĕ те вилнĕ. Следстви ĕçĕсем ирттерсен 31 боевика тĕп тунине палăртнă. Нурпаши Кулаева вара тытса чарнă, ăна çийĕнчех арестленĕ, суд мĕн виличченех тĕрмере тытса усрамаллине палăртса приговор кăларнă. Владислав Константиновичăн сăмахĕсем, теракт çинчен кăтартнă документаллă фильм пухăннисен чĕринче пăлхану çуратрĕ. Педагогсемпе вĕренекенсем Бесланта вилнĕ мĕнпур çынна асăнса çуртасем çутрĕç, пĕр самант шăп тăчĕç.
Ытахальтен мар ĕнтĕ сентябрĕн 3-мĕшĕнче Раççейре терроризма хирĕç кĕрешессипе пĕр шухăшлăх кунне паллă тăваççĕ. Çак куна 2005 çулхи июлĕн 6-мĕшĕнче йышăннă РФ «Раççейри çар мухтавĕн кунĕсем çинчен» федераци саккунĕпе килĕшÿллĕн çирĕплетнĕ. Çавăнпа та пирĕн кашнинех çакна асра тытмалла. Терроризма хирĕç кĕрешнинчен ытла, унран асăрхаттарассине тĕпе хумалла. Çавăнпа та чи малтанах Раççей территорийĕнче пурăнакан тĕрлĕ халăх культурине, конфессисен уйрăмлăхне хаклама вĕренмелле. Толерантность тата тĕрлĕ наци çынни пĕр-пĕрне хисеплени çеç терроризм çулне пÿлме пулăшать.
Э.ЭЛИНА.