Публикации » Пĕве пуçне юсаççĕ

08 сентября 2017 г.

Шĕмшеш тăрăхĕнчи Пиçенерти пĕве Пролетарски тата Иванов урамĕсене çыхăнтарса тăрать. Асăннă пĕве пуçĕпе çынсем çеç мар, автотранспорт та каçса çÿрет. Ял хуçалăх предприятийĕ пулнă тапхăртах тунă пĕве юшкăнпа тулма та, пĕве пуçĕ вырăнăн-вырăнăн ишĕлме те ĕлкĕрнĕ. Çакна тĕпе хурса вырăнти хăйтытăмлăх органĕ пĕве пуçне çирĕплетме палăртнă та. Иртнĕ кунсенче Элĕкри МСО организацийĕ пĕвене юшкăнран тасатнă, шыв юхса тухмалли тăрпана ишĕлме пуçланă вырăнтан тепĕр çĕре куçарса хунă. Çитес вăхăтра асăннă организаци ĕçченĕсем ейÿ вăхăтĕнче пĕве пуçне çисе каясран ятарласа бетонласа шыв юхмалли вырăн тăваççĕ. Пĕве пуçне тĕксе тикĕслеççĕ.