08 сентября 2017 г.
Кăçал район 90 çул тултарнине паллă тăвать. Унпа пĕрлех районпа пĕр çулхи аслă çынсене те палăртма кăмăллă. Вĕсенчен пĕри - Ураскилтре пурăнакан тыл ĕçченĕ, ĕç ветеранĕ Ульяна Степанова сентябрĕн 5-мĕшĕнче, районăн юбилей кунĕнче, 90 çул тултарнă.
Сумлă юбилейпа район администрацийĕн ĕçĕсен управляющийĕ Зиновий Федоров тата Ураскилт ял тăрăхĕн пуçлăхĕ Алина Филиппова чи ăшă та ырă сăмахсемпе тата Раççей Президенчĕн саламлă çырăвĕпе, парнесемпе саламланă.
Ульяна Ивановна 1927 çулхи сентябрĕн 5-мĕшĕнче Ураскилтре çуралнă. Мăн Вылă шкулĕнче вĕреннĕ хыççăн вăл тăван колхозра тивĕçлĕ канăва тухичченех вăй хунă. Хăйĕн ялĕнчи каччăпах çемье çавăрнă. Тимофей Степановпа 5 ывăлпа 2 хĕре кун çути парса ÿстернĕ.
Шел пулин те, мăшăрĕн пурнăçĕ ирех татăлнă. Апла пулин те Ульяна Ивановна пуçне усман, вăй-халне çухатман.
Тăван çĕршывăн Аслă вăрçинче хĕр пуççăн блиндажсем купаланă, окоп, траншея чавнă. Вăрçă пĕтнĕ хыççăн фермăра ĕçленĕ. Колхозра хĕрарăм ĕçне кăна мар, арçынăнне те пурнăçлама тивнĕ. Йывăр çулсем пулнă пулин те малашлăхра ыррине шанма тăрăшнă.
Паянхи кун юбилярăн 12 мăнукпа 13 кĕçĕн мăнук. Вăл халĕ кĕçĕн ывăлĕпе - Петр Тимофеевичпа пĕрле пурăнать. Ăна çывăх çыннисем пур енлĕ тимлĕх уйăраççĕ.
Аслă ывăлĕ - Юрий-пенсионер, Чăваш Рес- публикин тава тивĕçлĕ строителĕ, çурт купалакан компанире директор çумĕ пулса ĕçленĕ. Иккĕмĕш ывăлĕ - Геннадий-Чăваш Республикин автотранспортăн тава тивĕçлĕ ĕçченĕ, 6-мĕш номерлĕ автобазăн инженер-механикĕ. «Вилĕмрен çăлса хăварнăшăн» кавалерăн медале тивĕçнĕ.
Ульяна Ивановнăн тепĕр икĕ ывăлĕ те - Николайпа Петр строительство тытăмĕнче вăй хураççĕ. Хĕрĕ - Любовь «Иволга-молоко» обществăра лаборатори начальникĕнче ĕçлет.
Юбилярăн «1941-1945 çулсенче Тăван çĕршывăн Аслă вăрçинче хастар ĕçленĕшĕн», «Ĕç ветеранĕ» тата ытти юбилей медалĕсем тата Хисеп хучĕсем пур. «90 çул вăл - ÿсĕм çеç, чунпа вара эпĕ халĕ те çамрăк-ха», - тет вăл. Район тантăшĕ кашни çутă кунпа савăнса, киленсе пурăнать. Çулĕсем сахал мар пулин те юбиляр хăйне лайăх туять, вăй-халĕ те унăн иксĕлми.
К.ДАРИНИНА.