12 сентября 2017 г.
Спорт сывлăх çăлкуçĕ пулни шкул ачисем хушшинче иртнĕ Спартакиадăра та яр уççăнах курăнчĕ. 2017-2018 çулхи вĕренÿ çулĕнчи кĕркуннехи тапхăрта сентябрĕн 10-мĕшĕнче хамăр ентешĕн, çăмăл атлетика тусĕн - тĕнче класлă спорт мастерĕн Галина Александровăн парнисене çĕнсе илессишĕн çăмăл атлетика ăмăртăвĕ иртрĕ.
Спорт мероприятине ăмăртусен тĕп судйи, «Хĕлхем» спорт шкулĕн директорĕ Валерий Сергеев уçрĕ. Район администрацийĕн вĕренÿ пайĕн начальникĕ Петр Павлов, тĕнче класлă спорт мас-терĕ Галина Александрова, СССР тата РСФСР тава тивĕçлĕ тренерĕ, XXI Олимп вăййисене хутшăннă Виктор Семенов, район администрацийĕн вĕренÿ пайĕн ертсе пыракан специалисчĕ Арина Вонифатьева çамрăк спортсменсене ăнăçу сунчĕç.
Спортсменсем хăйсен вăйне 500, 1000, 2000, 3000 метрлă дистанцисенче тĕрĕслерĕç. Ăмăртăва вĕренÿ учрежденийĕсенчи 200 ытла хĕрпе каччă хутшăнчĕ. 2006 çултан кĕçĕннисем хушшинче Элĕк шкулĕнчи Павел Фоминпа Маргарита Поликарпова пĕрремĕш пулчĕç. Иккĕмĕш вырăна Юнтапа шкулĕнче вĕренекен Константин Кудрявцевпа Арина Мешкова тухрĕç. Виççĕмĕш вырăна Кирилл Петровпа (Тавăт шкулĕ) Карина Дубинина (Вутлан шкулĕ) тивĕçрĕç.
2004-2005 çулта çуралнисем хушшинчи ăмăрту та çивĕч иртрĕ. Шĕмшеш шкулĕнчи Никита Николаевпа Илемпи Васильева финиша чи малтан çитрĕç. Вутлан шкулĕнче вĕренекен Владимир Васильевпа Элĕк шкулĕнчи Алекса Александрова иккĕмĕш вырăнсене пайларĕç. Чăваш Сурăм шкулĕнче пĕлÿ илекен Егор Николаев тата Элĕк шкулĕн-чи Ксения Никитина виççĕмĕш вырăн йышăнчĕç.
2002-2003 çулта çуралнисенчен Никита Павлов (Элĕк) тата Мария Кириллова (Шĕмшеш) пĕрремĕш вырăн çĕнсе илме пултарчĕç. Николай Андреевпа (Вутлан) Ирина Иванова (Карачура) финиша иккĕмĕш çитрĕç пулсан, Никита Матьяновпа (Ураскилт) Софья Бойницына (Элĕк) - виççĕмĕш.
Аслăраххисем те старта тухрĕç. 2000-2001 çулхисем хушшинче Элĕксене çитекенни пулмарĕ. Евгений Федоровпа Анастасия Дубинина (Элĕк шкулĕ) пьедесталăн пĕрремĕш картлашки çине тăчĕç. Юнтапа шкулĕнчи Дмитрий Скворцовпа Чăваш Сурăмĕнчи Светлана Федорова иккĕмĕш, Элĕк шкулĕнчи Денис Захаровпа Ирина Свисткова виççĕмĕш вырăнсем çĕнсе илчĕç.
Пĕтĕм команда зачетĕнче вăтам шкулсем хушшинче Элĕк спортсменĕсем çĕнтерÿçĕ пулса тăчĕç. Иккĕмĕш вырăна Юнтапа шкулĕн маттурĕсем çĕнсе илчĕç, Шĕмшеш шкулĕ виççĕмĕш пулчĕ. Тĕп шкулсем хушшинче Вутлансем пĕрремĕш вырăн çĕнсе илчĕç. Кĕмĕл медале Тени шкулĕн спортсменĕсем тивĕçрĕç. Карачурасем виççĕмĕш вырăна тухрĕç. Çĕнтерÿçĕсене тата призерсене Хисеп хучĕпе тата медальсемпе чысларĕç.
Арина ВОНИФАТЬЕВА.