12 сентября 2017 г.
Юлашки темиçе çул ĕнтĕ Элĕк район больницинче пысăк квалификациллĕ специалистсем çитменни чылай пăшăрхану çуратать. 2011 çултанпа Раççейре «Земство тухтăрĕ» федераци программи пурнăçа кĕме пуçланăранпа медицина тытăмĕнче кадр ыйтăвĕсене пĕчĕккĕн те пулин татса параççĕ-ха.
Ултă çул хушшинче районти тĕп больницăна 10 çамрăк ĕçлеме илнĕ. Аса илтеретĕп, çÿлерех асăннă программăпа килĕшÿллĕн çамрăк тухтăрсене пĕр миллион тенкĕ укçа параççĕ. Унпа вĕсем хăйсене кирлĕ пек усă курма пултараççĕ. Палăртам-ха, ку чухне мĕнпур специалист ăна хваттер туянма тата çурт-йĕр лартма анчах усă курмасть. Пилĕк çул ĕçлеççĕ те каялла хулана таврăнаççĕ.
Иртнĕ тапхăрта «Земство тухтăрĕ» программăпа килнĕ специалистсенчен 3-шĕн ĕçлемелли вăхăчĕ тухнă, çавăнпа та вĕсенчен иккĕшĕ районтан кайнă. Пĕри вара халĕ те ĕçлет. Çавăн пекех пĕр тухтăр палăртнă вăхăт çитмесĕрех кунтан кайнине те асăнмалла.
Район больницин тĕп врачĕ Владимир Егоров кăçалхи çуркунне пĕтĕмĕшле практика врачĕн офисĕсенче ĕçлеме терапевтсем çукки, каярахпа больница ача-пăча стоматологĕсĕр тăрса юлнине пăшăрханса пĕлтернĕччĕ. Апла пулин те çу кунĕсенче кадрсемпе çыхăннă çивĕч ыйтăва татса пама шантарнăччĕ. Унтанпа вăхăт иртрĕ темелле. Ку тĕлĕшпе улшăнусем пур-ши;
- Сентябрĕн 1-мĕшĕ тĕлне «Земство тухтăрĕ» федераци программипе района тин çеç алла диплом илнĕ икĕ терапевт килчĕç. Вĕсем пирĕншĕн пачах та çĕнĕ çынсем теме çук-ха. Вĕреннĕ тапхăрта темиçе çулах практикăра кунти опытлă тухтăрсемпе юнашар ĕçлерĕç. Çакна та палăртмалла, хĕрсем медицина ĕçченĕн профессине ăнсăртран суйламан. Сăмахран, Юнтапа участокĕнче терапевтра ĕçлеме пуçланă Юлия Львовна Ермошкинăн ашшĕ те, амăшĕ те тухтăрсем. Çывăх çыннисен, Лев Николаевичпа Ираида Анатольевна Гурьевсен, династине тăсать хĕрĕ. Çавăн пекех Шĕмшеш участокне кĕрекенсен сывлăхне сăнаса тăракан Надежда Николаевна Матвеевăн амăшĕ те район больницин инфекци уйрăмĕнче ĕçлет.
Çамрăк терапевт Кивуй, Мăн Ямаш, Элеккенушкăнь ялĕсенчи фельдшерпа акушер пункчĕсенче те пулать, - каласа парать поликлиника заведующийĕ Василиса Архипова.
Çавăн пекех çу кунĕсенче ача-пăча стоматологĕ те тупăннă. Ку специалист та Элĕк тăрăхĕнчен тесен те йăнăшмăп. Людмила Юрьевна Данилова пĕлтернĕ тăрăх, унăн ашшĕ-амăшĕ Тавăт тăрăхĕнче çуралса ÿснĕ. Пирĕн района киличчен хĕр-упраç Шупашкарти пĕр поликлиникăра 6 çул стоматологра ĕçленĕ. Сăмах май, район больницин стоматологи уйрăмĕнче паян «Земство тухтăрĕ» программăпа килнĕ 3 специалист ĕçлеççĕ. Стоматологи уйрăмĕн заведующийĕ Т.Озерова пĕлтернĕ тăрăх, çамрăк специалистсем килнипе чылай ыйтăва татса панă, черет те пĕчĕкленнĕ.
- Кунне вăтамран шăл ыйтăвĕпе пирĕн пата 100-е яхăн çын кĕрсе тухать, вĕсен кăмăл-туйăмĕ кашнинех расна. Çавăнпа та ĕçе юратнипе пĕрлех пациентпа пĕр чĕлхе тупма пĕлни те, ăна хаклани те пысăк пĕлтерĕшлĕ, - палăртать стоматологи уйрăмĕн заведующийĕнче 30 çул тăрăшакан Тамара Филипповна.
2017 çулхи январь уйăхĕнче больницăра ультросасăлав тĕрĕслевне ирттерекен тухтăр та ĕçлеме пуçланă. Пĕлтĕр алла диплом илнĕ Алина Анатольевна Федорова тата тепĕр 6 уйăх ку енĕпе ятарлă пĕлÿ илнĕ.
- Кадрсем тĕлĕшпе çитес тапхăрта татса памалли тепĕр ыйту вăл - функционаллă диагностика енĕпе ĕçлекен тухтăра тупасси, кун пирки республикăри Сывлăх сыхлавĕн министерствине заявка панă. Асăннă специалист электрокардиограмма туса ÿпке, чĕре, пуç мĕнле ĕçленине тĕрĕслесе палăртать. Сăмах май, сентябрь уйăхĕнчен Элĕк районĕнче «Мобильлĕ фельдшер» пилотлă программа пурнăçа кĕме пуçларĕ. Унта хальлĕхе Элĕк тата Вăрнар районĕсем çеç хутшăнаççĕ-ха. Асăннă проектпа килĕшÿллĕн фельдшер Крымсарайкка тата Çулавăç ялĕсенчи фельдшерпа акушер пункчĕсенче чирлисене йышăнать, - çĕнĕлĕхпе паллаштарать Василиса Владимировна.
Эльвира КУЗЬМИНА.