22 сентября 2017 г.
Православи тĕнне тытса пыракансем ĕнер Туррăн Таса Амăшĕн кунне паллă турĕç. Чиркÿсенче хăватлă кĕлĕсем иртрĕç. Шăпах çак кун çулсеренех Ураскилт салинче шкул ачисем хушшинче мини-футбол турнирне ирттересси йăлана кĕчĕ.
Каласа хăвармалла, кăçал та анлă спорт мероприятине хатĕрленсе «Хĕлхем» стадионĕнче районти шкулсен командисем хушшинче малтанхи вылявсем иртрĕç. Хĕрÿ тупăшура çĕнтерÿçĕсем палăрчĕç. Арçын ачасенчен Элĕк, Питĕшкасси, Тавăт шкулĕсен командисем турнира хутшăнма путевка илчĕç пулсан, хĕрачасенчен - Мăн Вылă, Карачура, Чăваш Сурăм шкулĕсем пулчĕç. Ураскилт вăтам шкулĕн вĕренекенĕсем кил хуçисем пулнăран тÿрремĕнех вăйăсене хутшăнаççĕ. Турнира йĕркелекенсем ыйтнипе кăçал аслă ушкăнри вĕренекенсем хушшинче уйрăм ăмăрту йĕркелеме палăртрĕç.
Ураскилт чиркĕвĕн уявĕ ячĕпе иртекен турнир футбол вăййине кăмăллакансем хушшинче анлă сарăлнă. Командăсем çĕнтерÿçĕ кубокне çĕнсе илессишĕн вăйĕсене шеллемерĕç. Тăрăшнин усси пурах. Вăтам ушкăнри арçын ачасем хушшинче Элĕк шкулне çитекенни пулмарĕ. Тавăтсем 2-мĕш вырăна тухрĕç пулсан, Ураскилтсем - виççĕмĕшĕнче. Йĕркелÿçĕсем ку ушкăнри ачасем хушшинче пултаруллисене те тупса палăртрĕç. «Чи лайăх хÿтĕлевçĕ» номинацире Роман Лекарев пулчĕ (Элĕк шкулĕ), чи лайăх тапăнаканĕ вара Никита Матьянов (Ураскилт), чи лайăх вратарь - Даниил Константинов (Тавăт). Хĕрачасем те мечĕкпе туслине ĕçпе çирĕплетсе пама пултарчĕç. Çĕнтерÿçĕ ятне Мăн Вылă шкулĕн команди илчĕ пулсан, Чăвашсурăмсемпе Ураскилтсем призерсем пулчĕç, 2-мĕшпе 3-мĕш вырăнсене тивĕçрĕç. Ăсталăх тĕлĕшĕнчен те вĕсем арçын ачасенчен кая юлмарĕç. Чăваш Сурăм шкулĕн хĕрачисене ку енĕпе уйрăмах палăртмалла. Татьяна Арсентьева шанчăклăн хÿтĕлет пулсан, Анастасия Алексеева çивĕччĕн тапăнса командăна пысăк пулăшу пама пултарать. Воротăра тăрассипе вара Мăн Вылă шкулĕнчи Дарья Тимченко пуринчен те маттур пулнине ĕнентерсе пама пултарчĕ.
Аслă ушкăнри вăйăсене 10-11-мĕш классенче вĕренекен яшсем хутшăнчĕç. Çĕнтерÿçĕ ятне хальхинче Тавăт шкулĕн команди тивĕçрĕ, 2-мĕш вырăнта Элĕксем пулчĕç, 3-мĕшĕнче - Чăваш Сурăмсем. Паллах, вĕсем хушшинчи вăйăсенче уйрăмах палăрнисем пулчĕç. «Чи лайăх хÿтĕлекен» номинацире - Дмитрий Марков (Тавăт), «Чи лайăх тапăнаканĕ» - Евгений Марков (Элĕк), «Чи лайăх вратарь» - Денис Герасимов (Чăваш Сурăм).
Мини-футбол кăçалхипе 16-мĕш хут шкул ачисене пухрĕ. Паллах, кунта турнира йĕркелекенсен те, спонсорсен те тÿпи пысăк. Спорт вăййисене йĕркелеме Ураскилт чиркĕвĕн настоятелĕ Александр протоиерей чылай тимлет. Спонсорсем те аякра тăмаççĕ. Çулсеренех Элĕк район депутачĕсен Пухăвĕн депутачĕ, Элĕк райпо Канашĕн председателĕ Юрий Харитоновпа «Аликовская МСО» организацин ертÿçи Сергей Лаврентьев пысăк пулăшу параççĕ.
М.МИХАЙЛОВА