22 сентября 2017 г.
Чăваш кĕнеке издательстви Азербайджан çĕршывĕн тĕп хулинче Бакура пиллĕкмĕш хут иртекен Халăхсем хушшинчи кĕнеке куравне хутшăнĕ. Вăл сентябрь уйăхĕн 28 - 30-мĕшĕсенче иртĕ. Çак сумлă мероприятин тĕп тĕллевĕсем: вулакансен йышне ÿстересси, тĕрлĕ çĕршыври тата хулари издательствăсемпе кĕнеке çурчĕсене пĕр-пĕринпе çыхăнса ĕçлеме майсем туса пама пулăшасси. Бакура иртекен курав пуян та интереслĕ пулмалла: унта тĕрлĕ çĕршывра тухнă кăларăмсемпе паллашма май пулĕ, презентацисем, кĕнеке кăларассипе çыхăннă ĕçлĕ калаçусем иртĕç. Мероприятие пĕтĕмпе вăтăр ытла издательство хутшăнмалла.
Куравра Чăваш кĕнеке издательствин презентацийĕ те иртĕ, уява хутшăнакансем çĕнĕ те илемлĕ кăларăмсемпе паллашма пултарĕç. Мĕнпе савăнтарĕ-ха вулакансене пирĕн издательство; Кунта çак кĕнекесене асăнмалла: «Блюда чувашской кухни», Антон Салминăн «Праздники, обряды и верования чувашского народа», Юрий Ювенальевăн «Военное искусство суваро-болгар – предков чувашей», Елена Еньккан «Чăваш халăх тумтирĕ», Василий Каховскийĕн «Происхождение чувашского народа», Зоя Трифоновăн «Чебоксары – столица Чувашии», Анатолий Рыбкинăн «Мой старый добрый дом...», «Праски Витти. Живопись, эмаль, графика, монументальное искусство», Иван Дубановăн «Водоемы Чувашии»... Унсăр пуçне тăван ен культурипе тата историйĕпе паллаштаракан кăларăмсем, ача-пăча тата илемлĕ литература кĕнекисем, чăваш чĕлхин словарĕсемпе справочникĕсем стенд çинче тивĕçлĕ вырăн йышăнĕç.
Уяв вĕçĕнче кĕнекесене Россотрудинчество представителĕсене халалласа хăварĕç.
Ольга ФЕДОРОВА,
Чăваш кĕнеке издательствин редакторĕ.