29 сентября 2017 г.
Наркомание паян эпидеми пекех пысăк хăвăртлăхпа сарăлакан чирсен шутне кĕртмелле. Унăн çулне пÿлессипе туса ирттернĕ ĕçсем те хальлĕхе ку чир сарăлассине самантлăха та чараймаççĕ. Çавăнпа та паянхи обществăра ку тĕлĕшпе профилактика çине пысăк тимлĕх уйăрнине нимĕн те çитмест.
Çакна тĕпе хурса сентябрĕн 28-мĕшĕнче Элĕкри «Хĕлхем» ачасемпе çамрăксен спорт шкулĕнче районти вĕренÿ учрежденийĕсен командисем хушшинче «Спорт - наркотика хирĕç» девизпа мини-футбол вăййин пĕрремĕш турнирĕ иртрĕ.
- Наркотик - этем пурнăçне тĕпренех улăштаракан сиенлĕ, вăхăтлăх çеç киленÿ кÿрекен япала. Кăмăл-туйăмне çĕклессишĕн ăна тутанакана чирлĕ çынпа танлаштармалла. Вăхăтлăх киленÿшĕн темĕн те тума хатĕр наркоман. Сирĕн ăс-тăна минретекен япала çинчен хăвăр шухăшласа тивĕçлĕ йышăну тумалла, - мероприятие уçнă май палăртса каларĕ «Хĕлхем» ачасемпе çамрăксен спорт шкулĕн директорĕ Валерий Сергеев.
Район администрацийĕн вĕренÿ, социаллă аталану, çамрăксен политикин тата спорт пайĕн ертсе пыракан специалист-эксперчĕ Арина Вонифатьева çамрăк футболистсене ăнăçу сунса яланах спортпа туслă пулма чĕнсе каларĕ.
Район администрацийĕн наркотиксене хирĕç кĕрешессипе ĕçлекен комисси секретарĕ Татьяна Гордеева вара кунне 20 минут та пулсан физкультура тăвакан çын çан-çурăм тĕлĕшĕнчен те çирĕп пулнине, чирлеменнине палăртрĕ. Турнира 6 команда хутшăнма кăмăл тунă. Кĕрешÿ вара хĕрÿ иртрĕ. Ку чухне турнира хатĕрленни, мини-футбол вăрттăнлăхĕсене лайăх пĕлни пьедестал çине хăпарма пулăшрĕ те командăсене. Чăваш Сурăмĕнчи çамрăк футболистсем турнирта виççĕмĕш пулчĕç, Питĕшкассисем иккĕмĕш вырăна тухрĕç. Çĕнтерÿçĕ ята Элĕк шкулĕн команди тивĕçрĕ. Çĕнтерÿçĕпе призерсене дипломсемпе, медальсемпе тата парнесемпе чысларĕç. Çĕнтерÿçĕ команда куçса çÿрекен кубока тивĕçрĕ пулсан, турнира хутшăннă мĕнпур командăна футбол мечĕкĕсемпе чысларĕç.
Çавăн пекех чи вăйлă футболистсене виçĕ номинаципе палăртрĕç. «Чи лайăх вратарь» ята Никита Арсентьев тивĕçрĕ, «Чи лайăх тапăнакан» тата «Чи лайăх хÿтĕлевçĕ» номинацисемпе Павел Сурановпа Дмитрий Ефимова чысларĕç.
С.ЛЕОНТЬЕВ.
Сăн ÿкерчĕкре: Элĕк шкулĕн команди.