06 октября 2017 г.
Ĕнер хисеплĕ педагогсем тата пĕлÿ отраслĕн ветеранĕсем професси уявĕ ячĕпе ăшă саламсем йышăнчĕç. Районти вĕренÿ тытăмĕн ĕçченĕсем те хăйсен уявне паллă тума Элĕкри культура çуртне пухăнчĕç. Çак кун шкулсенче уроксем кĕскерех пулчĕç, шкулчченхи вĕренÿ заведенийĕсем ача сассипе тулмарĕç пулин те кÿренекен пулмарĕ. Пурте хăйсене пурнăç çулĕ çине тухма пулăшнă чи хисеплĕ çынсене тав сăмахĕ калама васкарĕ.
Çак ăшă туйăм залра палăрчĕ. Уяв программи пуçланиччен педагогсем хăйсемех хатĕрленĕ сăн ÿкерчĕксен куравĕпе паллашрĕç. Шкул пурнăçĕн интереслĕ саманчĕсем çырăннă сăн ÿкерчĕксенче. Вĕсем çине пăхсан мăнаçлăх туйăмĕ çуралать. Пур çĕре те ĕлкĕреççĕ-çке хăйсен шăпине ачасен пурнăçĕпе çыхăнтарнă çынсем - педагогсем.
Уява пухăннă педагогсен пĕрлĕхне район пуçлăхĕ Владислав Волков, район администрацийĕн пуçлăхĕ Александр Куликов, район администрацийĕн вĕренÿ пайĕн начальникĕ Петр Павлов, районти вĕренÿ ĕçченĕсен профсоюз организацийĕн председателĕ Эльвира Ржанова, район прокурорĕн пулăшаканĕ Алина Большова, Пĕтĕм Раççейри ирĕклĕ пушар обществин Чăваш Республикинчи Етĕрнери уйрăмĕн председателĕ Сергей Чернов саламларĕç. Кашниех хăйĕн сăмахĕнче шкул пурнăçне, юратнă вĕрентекенĕсене аса илчĕç тесен те йăнăш пулмĕ. Хаклă вĕрентекенсене тата педагогика ĕçĕн ветеранĕсене саламланă май иксĕлми хавхалану, çирĕп сывлăх сунчĕç. Паллах, уяв мероприятийĕ пултаруллисене чысламасăр иртмест. Хальхинче те тĕрлĕ шайри хисепе тивĕçрĕç педагогсем. Элĕк вăтам шкулĕн хими вĕрентекенне Алина Ивановăна тата Тавăт вăтам шкулĕн вырăс чĕлхипе литературине вĕрентекене Вера Федоровăна Раççей Федерацийĕн вĕренÿ тата наука министерствин Хисеп грамотипе чысларĕç. Чăваш Республикин вĕренÿ тата çамрăксен политикин министерствин Хисеп хутне Валентина Петрова (Элĕк), Светлана Алексеева (Чăваш Сурăм), Валентина Лукина (Тавăтри «Колосок» ача сачĕ) илчĕç.
Çулталăк тăршшĕпе вăй хуни уявра курăнчĕ. Сцена çине пĕрин хыççăн тепри хăпарчĕ. Район администрацийĕн тата вĕренÿ пайĕн Хисеп хучĕсене тивĕçнисем те чылай пулчĕç.
Професси уявĕ ячĕпе педагогсене Элĕкри ача-пăча ÿнер шкулĕн воспитанникĕсем, вырăнти юрăçсем саламларĕç.
М.ЛЕОНТЬЕВА.