06 октября 2017 г.
Октябрĕн 4-мĕшĕнче Раççейри Гражданла оборона йĕркеленнĕренпе 85 çул çитрĕ. Чи малтанах ку чухне вулакана Гражданла сыхлăх пĕлтерĕшне ăнлантарни ытлашши пулмĕ тетĕп. Гражданла сыхлăх вăл - Раççей Федерацийĕн территорийĕнче çар ĕçĕсене е ăна пула сиксе тухакан хăрушлăхран хÿтĕлеме хатĕрленессипе тата çынсене, пурлăха, культура пуянлăхне сыхлассипе çыхăннă мероприятисен тытăмĕ темелле. Çавăн пекех Гражданла сыхлăх çут çанталăкпа çыхăннă тата техногенлă чрезвычайлă лару-тăрура та хÿтĕлев ĕçĕсене пурнăçлать.
Çакна тĕпе хурса октябрĕн 4-6-мĕшĕсенче Пĕтĕм Раççейĕпех командăпа штаб тренировкине йĕркелесе ирттерме палăртнă. Çак ĕçе вара ĕç тăвакан власть, вырăнти хăйтытăмлăх органĕсем, районти мĕнпур предприяти-организаци хутшăнать. Октябрĕн 4-мĕшĕнче районти Гражданла сыхлăх председателĕ, район администрацийĕн пуçлăхĕ Александр Куликов патне ирхи ултă сехетрех пĕлтерÿ çитнĕ-мĕн.
Унта Раççей Федерацийĕн территорийĕнче çут çанталăкпа тата техногенлă чрезвычайлă лару-тăру сиксе тухнине пĕлтернĕ имĕш. Çавăн пекех кун йышши пĕлтерÿсем районти аварипе çăлав службисене, право хуралне, пушар чаçне те çитнĕ. Сакăр сехет тĕлне мĕнпур служба ертÿçисем район администрацийĕн актсен залне пухăнчĕç.
- Виçĕ кун хушшинче, командăпа штаб тренировки тапхă- рĕнче, пирĕн РФ территорийĕнче сиксе тухнă чрезвычайлă лару-тăрăва сирме Гражданла сыхлăха тĕпе хурса пĕтĕм ĕçе пурнăçламалла. Çакна вара пысăк шайра туса ирттермелле. Çак вĕренÿсем пĕтĕмпех эпир федераци, регион, вырăнта тата организацисемпе, предприятисемпе пĕрле Гражданла сыхлăха ÿстерес тĕлĕшпе мĕнле çыхăнса ĕçлеме пултарнине кăтартса параççĕ, - палăртрĕ Александр Николаевич.
Ку чухне аслисем Раççейри Гражданла сыхлăха ÿстерессипе ятарлă ĕçсем туса ирттернĕ чухне ачасемпе çамрăксем те тимлĕхсĕр юлаççĕ теме çук-ха. Çамрăк ăрăва та тĕрлĕ чрезвычайлă лару-тăрура хăйне тивĕçлипе тытма вĕрентес тĕллевпе октябрĕн 4-мĕшĕнче мĕнпур вĕренÿ учрежденийĕн- че ОБЖ предмечĕпе Пĕтĕм Раççейри уçă уроксем иртрĕç. Асăннă акцие Элĕк районĕнчи шкулсем те хутшăнчĕç. Юнтапари вăтам шкулти уçă урока вара ятарлă комисси хутшăнчĕ тесен те йăнăшмăп. Районти пушар надзор пайĕн аслă инспекторĕ Анастасия Гордеева тата вĕренÿ пайĕн информаципе методика центрĕн директорĕ Людмила Петрова пулчĕç кунта. Тÿрех палăртам, Юнтапасем хăрушлăх йĕркине çирĕп пăхăнаççĕ. Вĕренÿ учрежденийĕн пĕрремĕш хутĕнче ларакан дежурнăй документсене тĕрĕслемесĕр никама та малалла иртме ирĕк памасть. Сăнав камерисем те шкулти лару-тăрăва пĕр самантлăха та «куçран вĕçертмеççĕ».
Шкул директорĕ Альберт Кондратьев, вăлах ОБЖ предметне вĕрентекен, асăннă мероприятие виçĕ класа явăçтарма шутланă. 5-мĕшсемпе 10-11-мĕш классенче вĕренекенсем хутшăнчĕç уçă урока. Чи малтанах ачасене районти пушар надзор пайĕн аслă инспекторĕ Анастасия Гордеева Гражданла оборона çинчен каласа пачĕ, унăн историйĕпе паллаштарчĕ. Çак тытăм мĕнле ĕçсене пурнăçланине каласа ăнлантарчĕ. Ун хыççăн вĕренекенсем хăйсене кăсăклантаракан ыйтусем çине хурав илчĕç. Аслисене те, кĕçĕннисене те пушар хуралĕн, надзорĕн ĕçченĕсене ăçта вĕрентсе хатĕрлени, ку чухне вĕсен мĕнле тĕрĕслевсем витĕр тухма тивни интереслентерчĕ.
Альберт Кондратьев вара ачасене черетлĕ хут огнетушительпе тĕрĕс усă курмаллине ăнлантарчĕ. Ал айĕнче çулăма сÿнтермелли ятарлă хатĕрсем çук пулсан пушар çулне пÿлмелли ытти майсене те тишкерчĕç. Противогаз тăхăнмалли правилăсемпе те паллашрĕç ачасем. Противогазăн вăл е ку пайĕ юрăхсăра тухсан унпа усă курмалли вăрттăнлăхсене те тишкерчĕç.
ОБЖ урокне вара пушар пулни çинчен пĕлтерекен сигнализаци татрĕ.
- Палăртнă вăхăтра шкулти мĕнпур ачапа вĕрентекен тата ытти ĕçченсем хăрушлăхсăр вырăна тухса тăтăр. Учительсем те журналпах вĕрентекенсене тĕрĕслерĕç. Ку енĕпе ÿпкелешмелли çук. Анчах та никам та пĕтĕм класран пурте тухнине тĕрĕслемерĕ. Çакă вара çитменлĕх шутланать, - асăрхаттарчĕ вĕренĕве пĕтĕмлетнĕ май пушар надзор пайĕн аслă инспекторĕ Анастасия Гордеева. Кун йышши вĕренÿсем аслисен яваплăхне ÿстернипе пĕрлех ачасене те сыхлăха ÿстерме пулăшаççĕ.
Эльвира КУЗЬМИНА.