06 октября 2017 г.
Октябрĕн 2-3-мĕшĕсенче Наци библиотекинче Чăваш Ен информаци политикипе массăллă коммуникацисен минстерстви пуçарăвĕпе республикăри массăллă информаци хатĕрĕсене, власть тата вăй ведомствисен органĕсен пресс-службисене валли пирвайхи хут «Массăллă информаци хатĕрĕсенче терроризмпа экстремизма хирĕç кĕрешессин информаци хăйевĕрлĕхĕсен йĕркеленĕвĕ» темăпа семинар иртрĕ.
Пĕрремĕш кунхине Чăваш Республикин терроризма хирĕç кĕрешекен комисси аппарачĕн ертÿçи Евгений Терешин терроризмпа экстремизм идеологине хирĕç кĕрешесси журналист ĕçĕнче пысăк вырăн йышăннине палăртрĕ. «Журналист халăх патне тĕрĕс информаци çитерсе вулакан ку е вăл лару-тăрăва еплерех хаклани питĕ пĕлтерĕшлĕ», - палăртрĕ вăл. Çÿлерех асăннă темăпа экстремизма хирĕç кĕрешессипе наукăпа вĕренÿ центрĕн ертÿçи, Раççейри коопераци университечĕн Шупашкарти кооператив институчĕн (филиалĕн) юридици факультечĕн деканĕ Михаил Тимофеев паянхи пурнăçра информаципе коммуникаци технологийĕсем террористсене хăйсен киревсĕр ĕçĕсене аталанма май панине каларĕ.
Терроризмпа кĕрешмелли психологи аспекчĕсем çинчен обществăлла хăрушлăх преступленийĕсене хирĕç кĕрешекен эксперт Светлана Яковлева психолог ăнлантарса пачĕ. Экстремистла ушкăнсене лекнĕ çынсенче мĕнлерех улшăнусем пулса иртнине палăртрĕ. Çакна вăл курăмлă материалсемпе, террорла информацие халăх хушшинче мĕнле сарнине видеороликсемпе ĕнентерчĕ.
«Раççей Федерацийĕн патшалăх наука центрĕ - А.И.Бурназян ячĕллĕ федерацин биофизика медицина центрĕ» учрежденин экстремаллă психологи лабораторийĕн аслă наука сотрудникĕ Татьяна Синицына журналистсен чрезвычайлă лару-тăрура, çав вăхăтрах террорла актсенче мĕнле пулмаллине ăнлантарчĕ. Чрезвычайлă лару-тăрăва психологсемпе журналистсемсĕр сирме çук. Енчен те медицина ĕçченĕсем инкеке лекнисене тата тăванĕсемпе çывăх çыннисене пирвайхи медицина пулăшăвĕ параççĕ пулсан, журналистсен тĕп тивĕçĕ - халăха тĕрĕс информаципе тивĕçтересси. Эксперт чи малтанах массăллă информаци хатĕрĕсене халăх ĕненнине асăнчĕ, журналистăн ĕçĕ яваплă пулнине каларĕ. Унсăр пуçне МИХсен страницисенче экстремаллă лару-тăрăва çутатнă чухне профилактика мероприятийĕсене те çырса памалла. Эксперт-психологсем кулленхи пурнăçра пулса иртнĕ тĕслĕхсем илсе пани вырăнлă пулчĕ.
Журналистсене валли хатĕрленĕ программа иккĕмĕш кунхине те интереслĕ иртрĕ. «Россия сегодня» патшалăх интернет-проекчĕн дирекцийĕн кăларăм редакторĕ, филологи наукисен кандидачĕ Елена Дорошенко массăллă информаци хатĕрĕсем социаллă сетьсенче те терроризмпа кĕрешме май пултарнине палăртрĕ. Террористсен тĕн тата нацилĕх çуккине, вĕсен тĕп тĕллевĕ вĕлересси мар, хăратасси пулнине асăнчĕ. Хăй вăхăтĕнче ислам тĕнне йышăннă, вербовкăна аталантарнă Хусантан килнĕ хĕрарăмпа та тĕл пулчĕç журналистсем. Вăл çак «тыткăна» ытларах çамрăксем тата ĕçлемен, пĕлÿ илмен çынсем лекнине каласа пачĕ.
Раççейри халăхсен Ассамблейин Канашĕн Председателĕн çумĕ, РФ Обществăлла палата çумĕнчи нацисен Раççей клубĕн яваплă секретарĕ Андрей Худолеев журналистсене сăмах вăйне пĕлсе усă курма сĕнчĕ. Вăл «Белая книга террора» кĕнекипе паллаштарчĕ, мастер-класс ирттерчĕ. Терроризма хирĕç кĕрешекен наци комитечĕн Информаци центрĕн представителĕ Александр Поляков асăннă тытăмăн ĕç-хĕлне çутатса панă май журналистсене статьясем çырнă чухне кирлĕ органсемпе тачă çыхăнса ĕçлемеллине палăртрĕ. Экспертсен шухăшĕпе килĕшес килет, мĕншĕн тесен сăмахăн асамлă вăй пур. Унпа çапса хуçма та пулать. Çавăнпа та информаци инструменчĕсемпе пĕлсе тата вырăнлă усă курмалла.
Журналистăн хăйĕн тавракурăмне ÿстермелле, хамăр тăрăхри хыпарсене пĕлсе тăмалла. Журналист этикине пăхăнса чрезвычайлă лару-тăрăва лексен çухалса каймалла маррине, тĕрĕс шухăшламаллине халăха ăнлантарса пани тĕп тĕллевĕсенчен пĕри пулса тăрать. Семинара хутшăннă кашни журналиста вĕреннине çирĕплетекен свидетельство пачĕç. Пĕлÿ илни кулленхи ĕçре пулăшасса шанас килет.
Вера МОРОЗОВА.