24 октября 2017 г.
- Выльăх-чĕрлĕхрен пысăк тупăш илесси çине мĕнле апатлантарнипе пĕрлех ăна мĕнле условисенче тытни те пысăк витĕм кÿрет, - палăртнăччĕ «Новый путь» хуçалăх ертÿçи Иван Игнатьев ĕç ăнăçлăхĕ пирки сăмах пуçарсан. Тĕрĕсех ĕнтĕ. Çакна тĕпе хурса Чăваш Сурăмĕнчи, Мăн Шĕвĕшри, Юлăшри сĕт-çу комплексĕсенче ферма çурчĕсене паянхи стандартсене тĕпе хурса çĕклеççĕ те кунта.
Иртнĕ шăматкун асăннă ял хуçалăх предприятийĕ кăçалхи улттăмĕш çĕнĕ объекта хута ячĕ. Сурăмсем ултă уйăха çитмен 100 пуç çамрăк выльăх валли тунă çĕнĕ ферма çуртне савăнăçлă лару-тăрура уçрĕç. Асăннă мероприятие ял хуçалăх предприятийĕнче ĕçлекенсемпе пĕрлех район пуçлăхĕ Владислав Волков, район администрацийĕн ял хуçалăхĕпе экологи пайĕн начальникĕ Анатолий Прохоров, Агропромышленность комплексĕн ветеранĕсен председателĕ Николай Сергеев, ăратлăх енĕпе ĕçлекен «Чувашское» уçă акционерлă обществăн генеральнăй директорĕ Михаил Гурьев, асăннă обществăн экс-директорĕ Иван Козин, Чăваш Сурăм ял тăрăхĕн пуçлăхĕ Виктор Сорокин тата Элĕкри выльăх-чĕрлĕх чирĕсене хирĕç кĕрешекен станци начальникĕ Валерий Афанасьев хутшăнчĕç.
- Хуçалăхри черетлĕ объекта хута яни кунта вăй хуракансемшĕн уйрăмах пĕлтерĕшлĕ. Ферма çуртне çĕклес ĕçре яланхиллех вырăнти строительсен тÿпи пысăк, ăна тума 8 миллион тенкĕ кайрĕ. Ку вара пĕтĕмпех хамăрăн укçа-тенкĕ. Çавăн пекех уйрăммăн Александр Никифоров подрядчика тав сăмахĕ каласшăн, - палăртрĕ «Новый путь» хуçалăх ертÿçи И.Игнатьев. Вăл строительствăпа монтаж ĕçĕсене пурнăçлакан слесаре Владимир Павлова, Чăваш Сурăмĕнчи производство участокĕн строительсен бригадин бригадирне Анатолий Тихонова тата Валерий Тихонов механизатора укçан преми парса хавхалантарнине пĕлтерчĕ.
- Чăвашсурăмсен çитĕнĕвĕсем çинчен районта çеç мар, республикăра та пĕлни пире пурне те хăпартлантарать. Çулсеренех тĕш тырă культурисенчен пысăк тухăç, выльăх-чĕрлĕхрен те тупăш илессине ÿстерсе пынипе хăвăр ĕçлеме ÿркенменнине çирĕплетсе паратăр. Черетлĕ ферма çуртне хута яни те сирĕн тĕллевĕрсем пысăк пулнине палăртать. Эппин, малашне те ăнăçу çеç пултăр, - саламларĕ хуçалăх ĕçченĕсене район пуçлăхĕ Владислав Волков. Çавăн пекех ытти хăнасем те тухса калаçрĕç. Николай Сергеев вара хуçалăх ертÿçине Иван Игнатьева Чăваш Республикин агропромышленность комплексĕн энциклопедине парнелерĕ. Ун хыççăн хĕрлĕ хăю касса çĕнĕ фермăри условисемпе паллашрĕç.
Ултă уйăха çитмен пăрушкасене кунта виççĕн пăхĕç. Ку енĕпе пĕтĕмĕшле ĕç-хĕле йĕркелесе пырасси Наталия Захарова çине тиенет пулсан, çамрăк выльăх епле аталантарассишĕн Валентина Васильевăпа Ольга Алексеевăн та сахал мар тăрăшма тивет. Опытлă пăру пăхакансем темиçе çулах яваплăха туйса ĕçлеççĕ. Вĕсем пăхакан пăрушкасен талăкри ÿт хушаслăхĕ вăтамран 1000 грампа танлашать.
Э.ЭЛИНА.