Публикации » Пĕлÿ шайне тĕрĕслеççĕ

14 ноября 2017 г.

Пултарулăхне аталантарас тата шкул сакки çинче ларнă тапхăртах ăслăлăх ĕçне хутшăнас шутлă вĕренекенсем районти шкулсенче сахалах мар. Вĕсене тупса палăртас ĕçре Пĕтĕм Раççейри шкул ачисен предмет олимпиадисем пысăк пулăшу кÿреççĕ. Иртнĕ тапхăрта районти вĕренÿ учрежденийĕсенче предмет олимпиадисен шкулти тапхăрĕ иртрĕ, унта тĕрлĕ предметпа пысăк балсем пухса 180 ытла ача палăрнă. Вĕсенчен кашниех çитес тапхăрта олимпиадăсен муниципалитет тапхăрне хутшăнса республикăра иртекен тĕрĕслевсене каяссишĕн тупăшĕ. Ĕнер вара районти 12 шкулти 7-11-мĕш классенче пĕлÿ илекен 45 ача чăваш чĕлхипе тата литературипе регионти олимпиадăн муниципалитет тапхăрне хутшăннă. Ноябрĕн 15-мĕшĕнче тăван ен культурине шĕкĕлчеме юратакансем те хăйсен пĕлÿ шайне олимпиадăра тĕрĕслĕç.