14 ноября 2017 г.
Хăш чухне çын чĕлхи мĕн калаçнине ăнланма йывăр, выльăх чĕлхине вара пушшех те пĕлейместĕн. Чĕр чун ыратнине нăйкăшса пĕлтерет. Сăмахпа каламасăрах ăна ăнланма пултаракан çын вăл - выльăх тухтăрĕ. Ветеринар чирленĕ чĕр чуна сыватиччен ăна мĕн канăçсăрлантарнине курать.
Унăн профессийĕ йывăр. Çынна сыватнипе танах ĕнтĕ. Ветеринар пулма чун туртни пулăшать, выльăха юратни те пĕлтерĕшлĕ. Ача чухне, нумайăшĕ астăвать пулĕ, чĕр чунсене питĕ хытă юратнă, хĕрхеннĕ. Ачасенчен чылайăшĕ тухтăр пулма ĕмĕтленет. Уйрăмах пĕчĕк хĕрачасем тухтăрла выляма юратаççĕ.
Анаткас Сурăм ялĕнче пурăнакан Алевтина Семенова та мĕн ачаран тухтăр пулма ĕмĕтленнĕ. Вăрнар хĕрĕ вун пĕр класс пĕтернĕ хыççăн çавăнпах медицина колледжне вĕренме кĕресшĕн пулнă, анчах та шăпа ăна Вăрнарти ял хуçалăх техникумне илсе çитернĕ. Çапла майпа ветеринари уйрăмне вĕренме кĕнĕ. Унта виçĕ çул пĕлÿ илнĕ.
Чи пĕрремĕш практика Çĕмĕрлери ветеринари участокĕнче иртнĕ. Унтан пулас ветеринар Нурăсра хăйне тĕрĕсленĕ, опыт пухнă, ветеринари енĕпе вăрттăнлăхсене уçнă. Каярахпа Элĕк район каччипе - Михаил Семеновпа пĕр çемье çавăрнă.
Халĕ телейлĕ мăшăрăн икĕ хĕрача ÿсет. Алевтина Анатольевна паянхи кун Олег Петров ертсе пыракан хресчен-фермер хуçалăхĕнче ĕçлет. Çамрăк специалист кунта ветеринари фельдшерĕнче ĕçлеме пуçлани çичĕ уйăх кăна çитнĕ. Апла пулин те сысна ферминчи коллективпа пĕр чĕлхе тупнă та вăл. Кунта унăн яваплăхĕ пысăк. Хуçалăхри 800 яхăн пуç сыснана сăнаса тăмалла. Чи кирли - хăрамалла мар. Кашни сысна тĕрлĕрен вĕт. Ветеринарăн вара кирлĕ вăхăтра ăна сыватма та, профилактика тума та пĕлмелле. Ăна мĕн чухлĕ тасара тытатăн, çавăн чухлĕ тĕрлĕ инфекци ерес хăрушлăх пĕчĕкрех. Вакцинăсене те вăхăтра туса ирттермелле. Çамрăк фельдшер хăйĕн юратнă ĕçне чунтан тăвать.
А.СИЛИВЕСТРОВА.