17 ноября 2017 г.
Çулталăк пуçланнăранпа «Единая Россия» парти пуçарăвĕпе чылай проект пурнăçа кĕрет. Вĕсенчен пĕри вăл - «Вырăнти культура çурчĕ» проект. Унпа килĕшÿллĕн ялти клубсене тата культура çурчĕсене çĕнетеççĕ, пурлăхпа техника базине пуянлатаççĕ.
Паян ял çыннине, çамрăксене культура çурчĕ кирлĕ-и; Паллах, кирлĕ тейĕ нумайăшĕ. Çамрăксен каçпа ăçта пуçтарăнмалла, тĕрлĕ уяв-мероприяти ăçта ирттермелле, кружоксене ăçта çÿремелле тата ытти те. Пĕр вăхăт ял пĕтнин сăлтавĕ культура вучахĕсем сÿннинче тетчĕç. Пытараймăн, культура тытăмĕнчи лару-тăру пур çĕрте те пĕр пек мар çав. Республикăри культура пурнăçне лайăхлатасси яланах тĕп ыйтусенчен пĕри пулнă. Чăваш Республикин Пуçлăхĕн Михаил Игнатьевăн «Ял тăрăхĕсенче культурăпа кану учрежденийĕсен сетьне аталантармалли мерăсем çинчен» указĕпе килĕшÿллĕн 2016-2018 çулсенче пирĕн республикăра чылай ялта çĕнĕ клубсем тумалла, вĕсем нумай функциллĕ евĕр пулмалла. Хальхи йышши культура çурчĕсенче куракансен залĕ те, кружок ирттермелли пÿлĕмсем те, библиотека та пулма тивĕç. Проектăн тĕп тĕллевĕ пахалăхне лайăхлатнипе пĕрлех культурăпа массăллă мероприятисене халăха йышлăн явăçтарасси, çавăн пекех культура пурлăхне сыхласа хăварасси, çамрăксен канăвне йĕркелеме хальхи йышши условисем туса парасси, халăх пултарулăхне аталантарасси.
Проекта пурнăçа кĕртме Чăваш Ене федераци бюджетĕнчен 33879,9 пин тенкĕ, республика бюджетĕнчен 3764,5 пин тенкĕ укçа уйăрнă. Çавна май республикăри ялсенчи 31 клуба юсама, 25-шне çĕнетме палăртнă. «Вырăнти культура çурчĕ» проекта пирĕн районтан Вутланти культура çурчĕ те хутшăннă. «Эпĕ ĕçлеме килнĕ чухне кунта сасă аппаратури кивĕччĕ, сцена та паянхи пурнăçпа килĕшсе тăмастчĕ. Вĕсене çĕнетни питĕ пĕлтерĕшлĕ. Пирĕн, культура ĕçченĕсен, халăха лайăх кану йĕркелесе пама пĕлмелле. Ĕçлесе ывăннă хыççăн ял çыннин канма мĕнпур услови пултăр, - палăртать Вутланти культура çуртĕнче тăрăшакан Маргарита Васильева.
Халĕ Вутланти сцена хуларинчен те кая мар. Кунта илемлĕ те хăтлă. Сцена валли карăсем, çутă, сасă тата видеопроекци оборудованийĕ, купăс, ноутбук тата сцена тумтирĕ туяннă. Культура çурчĕн пурлăхпа техника базине пуянлатма 516670 тенкĕ укçа тухса кайнă. Асăннă укçа-тенкĕпе тĕллевлĕ усă курнине те палăртса хăвармалла.
Маргарита Енисеевна шучĕпе, сасă тата çутă аппаратурине çĕнетни малашне культура çуртĕнче иртекен концерт программисен пахалăхне пуянлатать. «Культура вучахĕ ялкăшасси хамăртан нумай килет. Шел пулин те, ял çыннине культура пурнăçне явăçтарма йывăртарах», - шухăшне пĕлтерчĕ Маргарита Васильева. «Вырăнти культура çурчĕ» 50 пин çынран сахал пурăнакан ялсенче тата хуласенче пурнăçланать, вăл икĕ çуллăха пырать. Ăна кашниех хаклама пултарать. «Единая Россия» парти проекчĕ 2018 çулта тата планпа пăхнă 2019-2020 çулсенче пурнăçа кĕтĕр тесен 2017 çултах кирлĕ документсене хатĕрлеме тытăнмалла. Ку чухне вара ял тăрăхĕсен пуçлăхĕсен пуçарулăхĕнчен тата тавçăрулăхĕнчен нумай килет. Анчах та асăннă проекта пурте хутшăнма пултараймаççĕ. Чи кирлĕ критери - ялти культура çурчĕн 100 вырăнтан кая мар пулмалла, документсен пурин енĕпе те тивĕçтермелле.
Вера МОРОЗОВА.