08 декабря 2017 г.
Декабрĕн 6-мĕшĕнче Раççей Президенчĕ Владимир Путин «Раççей доброволецĕ - 2017» Пĕтĕм Раççейри çулсеренех паракан преми çĕнтерÿçисене чысланă мероприятие хутшăннă. Унта çĕршыв ертÿçи Раççейре 2018 çул Доброволец çулталăкĕ пулассине пĕлтернĕ.
«Çакă эсир хисепе тивĕçнĕ ырă ĕçĕрсемпе хамăр çĕршыв аталанăвне пысăк тÿпе хывнă граждансене пулăшу кÿнин тата хÿтĕленин, çынсене хисепленин хаклавĕ пулать. Çакă сирĕн, çĕршыври кашни гражданинăн, Раççейĕн тĕп вăйне - ирĕклĕхе, хастарлăха, ырă кăмăллăха палăртакан çулталăк пулĕ», - тенĕ Владимир Путин Пĕтĕм Раççейри ырă кăмăллăх форумне хутшăнакан волонтерсене.
Çакна та палăртмалла, декабрĕн 4-6-мĕшĕсенче Мус- кавра Пĕтĕм Раççейри ырă кăмăллă çынсен форумĕ иртет. Вăл Раççейри волонтер пĕрлешĕвĕсен тĕп çăлкуçĕ шутланать, лидерсене, обществăлла организацисене тата проектсене, «кĕмĕл» ÿсĕм тапхăрĕнчи ырă кăмăллă çынсене, регионти пĕтĕм Раççейри юхăмсен координаторĕсене пĕрлештерсе тăрать. Форумăн асра юлмалли саманчĕ - Раççейри шоу-бизнес çăлтăрĕсем уява хутшăнни, çавăн пекех «Раççей доброволецĕ - 2017» çулсерен паракан премин çĕнтерÿçисене чыслани.
Асăннă форума Чăваш Енрен 200-е яхăн çын кайнă. Вĕсен йышĕнче шкул ачисем те, тĕрлĕ аслă вĕренÿ заведенийĕнче ăс пухакан студентсем те, преподавательсем те, ĕçлекен çамрăксем те пур. Волонтерсем тавлашусенче, мастер-классенче, регионсенче чи ăнăçлă пурнăçланакан презентацисене хутшăнчĕç. Унсăр пуçне волонтерсен пысăк юхăмĕсен «Медик-волонтерсем», «Çĕнтерÿ волонтерĕсем» пухăвĕсем, волонтер центрĕсен Ассоциацийĕсем иртрĕç.
Чăваш Республикинче волонтер ĕçĕ-хĕлĕ ăнăçлă аталанать. Юлашки 5 çулта кăна волонтерсен йышĕ икĕ хут ÿсрĕ, 2011 çулхи 20 пин çынран кăçал 43 пине çитрĕ. Волонтерсем тĕрлĕ шайри мероприятисене хастар хутшăнаççĕ, обществăлла ĕçсенче палăраççĕ, Президент гранчĕсене çĕнсе илеççĕ, тĕрлĕ проекта пурнăçа кĕртеççĕ. 2017 çулта хастар çамрăксен виçĕ проекчĕ Президент грантне çĕнсе илни те пирĕн республикăшăн пĕлтерĕшлĕ пулăм шутланать.
Волонтерсен пĕрлехи ĕçĕ юхăмсене пĕрлештерет çеç мар, туслăха та çирĕплетет.
В.НИКИФОРОВА.