12 января 2018 г.
Январĕн 11-мĕшĕнче республикăра шкул ачисен Пĕтĕм Раççейри олимпиадин регион тапхăрĕ француз чĕлхинчен пуçланчĕ. Чăваш Республикин Вĕренÿ тата çамрăксен политикин министрĕ Юрий Исаев тата И.Я.Яковлев ячĕллĕ Чăваш патшалăх педагогика университечĕн ректорĕ Владимир Иванов олимпиадăна хутшăнакансене ăнăçу сунчĕç.
«Регион тапхăрĕнчи олимпадăна 1800 шкул ачи хутшăнать. Вĕсем - хальхи вĕренÿ çулĕнче муниципалитет тапхăрĕнчи тата 2016-2017 вĕренÿ çулĕнче регион тапхăрĕнчи олимпиадăра çĕнтернисем тата призерсем. Кăçал регион тапхăрĕнче 22 предметпа олимпиада иртĕ. Пирĕн республикăран 3 шкул ачи пирвайхи хут китай чĕлхипе олипиадăна хутшăнма кăмăл тунă», - палăртрĕ Юрий Николаевич. Владимир Иванов ашшĕ-амăшне тата вĕрентекенсене тав турĕ. Вăл шкул ачисем олимпиадăра çĕнтерессе шаннине пĕлтерчĕ.
Районтан олимпиадăсене 14 предметпа 31 ача хутшăнать. Вĕсенчен 25 вĕренекенĕ Элĕк вăтам шкулĕнчен. Тавăт вăтам шкулĕнчен 2 вĕренекен республикăра район чысне хÿтĕлĕç. Мăн Ямаш, Чăваш Сурăм, Юнтапа, Карачура шкулĕсенчен пĕрер ача республикăри тĕрлĕ шкулсенчи тантăшĕсемпе вăй виçме хатĕрленеççĕ. Çавăн пекех Юнтапа шкулĕнчи икĕ вĕренекен чăваш чĕлхипе литературине пĕлнине çирĕплетĕç.
Н.СМИРНОВА.