23 января 2018 г.
Иртнĕ эрнере массăллă информаци хатĕрĕсем Раççей тата чăваш пичечĕн кунне паллă турĕç. Савăнăçлă мероприяти Яков Ухсай ячĕллĕ культура керменĕнче иртрĕ. Унта «Пурнăç çулĕпе» район хаçачĕн ĕçченĕсем те хутшăнчĕç.
Мероприяти пурин асĕнче те юлтăр тесе «Прессăн ылтăн фондне» кĕнĕ пичет кăларăмĕсен логотипĕсенчен сăн ÿкерĕнме ятарлă стендсем тунă. «Пурнăç çулĕпе» хаçатăн стендчĕ журналистсен тĕпелне аса илтерчĕ.
Чăваш Республикин Пуçлăхĕ Михаил Игнатьев журналистсемпе полиграфистсене, пичет ветеранĕсене уяв ячĕпе саламларĕ. «Эсир халăх патне çĕршыври тата тĕнчери мĕнпур паллă пулăмсене илсе çитеретĕр, çынсен социаллă ыйтăвĕсене татса пама пулăшатăр», - палăртрĕ Михаил Васильевич. Чăваш Республикин Информаци политикипе массăллă коммуникацисен министрĕ Александр Иванов пĕтĕмĕшле ĕç-хĕл çинче чарăнса тăчĕ, умри тĕллевсене палăртрĕ, наградăсем пачĕ. Массăллă информаци хатĕрĕнчи тава тивĕçлĕ ĕçсемшĕн тата нумай çул тăрăшса ĕçленĕшĕн «Пурнăç çулĕпе» район хаçачĕн редакторне Эльвира Кузьминана министерствăн Хисеп хучĕпе чысларĕ. Çавăн пекех хамăр ентеш, Наци радиовĕн аслă редакторĕ Алина Герасимова тăван чĕлхене, культурăна тата чăваш халăхĕн йăли-йĕркине сыхласа хăварассипе ача-пăча тата çамрăксем валли радиокăларăмсем хатĕрленĕшĕн Çемен Элкер ячĕллĕ премие тивĕçрĕ.
Уява пухăннисем савăнăçлă концерт курса киленчĕç. Илемлĕ юрă-ташă пурин кăмăлне те кайрĕ.
В.НИКИФОРОВА.