02 февраля 2018 г.
2018 çулхи январĕн 1-мĕшĕнчен Раççей Федерацийĕн Суд приставĕсен службин Чăваш Республикинчи Управленийĕн Элĕк районĕнчи уйрăмĕнче хăш-пĕр çĕнĕлĕхсем пурнăçа кĕчĕç. Кăçалтан ĕç тăвакан суд приставĕсем парăм укçине квитанципе йышăнмаççĕ.
Ĕç докуменчĕсемпе парăма пур граждансем халĕ электрон программа хатĕрĕ урлă пластик карточкăпа районти суд приставĕсен уйрăмĕнчех вырнаçнă терминалпа усă курса тÿлеме пултараççĕ. Тÿлеве VISA, MasterCard, МИР банк карттисемпе усă курса пурнăçлама май пур. Ку чухне кредит е ытти карттăпа усă курнăшăн тÿлевĕн суммин 2 проценчĕ чухлĕ, анчах та 20 тенкĕрен кая мар процент илеççĕ.
Енчен те гражданинăн пластик картта çук пулсан парăма кирек епле банкра та е почта çыхăну уйрăмĕнче те татма пулать. Ку чухне квитанци патне районти суд приставĕсен уйрăмне килмелле е Чăваш Енри Суд приставĕсен Управленийĕн «Ĕç производствисен даннăйĕсен Банкĕ» интернет-сервиса кĕрсе квитанцие пичетлемелле. Асăннă сервис тÿлевĕн тĕрлĕ электрон тытăмĕпе усă курса укçа тÿлеме май парать.
Кунсăр пуçне район çыннисем патшалăх пулăшăвĕсен Пĕрлехи порталĕпе усă курса парăма татма пултараççĕ.
Ĕç производствисемпе парăм пур район çыннисене хăйсен ирĕкĕпех парăма татма сĕнес килет. Паян парăма татмалли процедура питех те ансат. Чи малтанах гражданинăн РФ Суд приставĕсен Федераци службин Чăваш Республикинчи Управленийĕн официаллă сайтне çак адреспа кĕмелле www.r21.fssprus.ru. «Ĕç производствисен даннăйĕсен Банкĕ» сервиспа пурте усă курма пултараççĕ, унта вара ята тата хушамата палăртса парăм пуррине пĕлтерекен мĕнпур информаципе туллин паллашма май пур. Асăннă сервис урлă юридици сăпатлă çынсен парăм пуррипе çуккине те пĕлме пулать.
Яна ЗИНГЕР,
районти суд приставĕсен уйрăмĕн начальникĕ.