02 февраля 2018 г.
Виçĕмкун Элĕкри вăтам шкулта районти çамрăк хастарсен Шкулĕ ĕçлерĕ. Унăн тĕп теми Элĕк районĕнче Раççей шкул ачисен юхăмĕн ĕç-хĕлне йĕркелесси пулчĕ.
Кунта районти чи хастар, чи пултаруллă, чи пуçаруллă тата пур енчен те маттур вĕренекенсем пуçтарăнчĕç. Асăннă мероприяти Раççей шкул ачисен юхăмĕн флешмобĕнчен пуçланчĕ, унсăр пуçне çак юхăмăн хастарĕсемпе те паллашма май килчĕ. Пухăннисене чи малтанах Ачасемпе çамрăксен пултарулăх центрĕн директорĕ, Раççей шкул ачисен районти юхăмĕн координаторĕ Олимпиада Лазарева саламларĕ. Районти çамрăк хастарсен Шкулĕн ĕç программипе воспитани енĕпе ĕçлекен директор çумĕ Марина Данилова паллаштарчĕ.
Ачасем тĕрлĕ енлĕ тематика ушкăнĕсенче вĕренчĕç. Акă, тĕслĕхрен, «Информ-медиа» ушкăнра Элĕкри вăтам шкулăн пултарулăх коллективĕ ку е вăл фильм мĕнле никĕс çинче ÿкерĕннине кăтартрĕ. Д.Львов, Н.Ивановская, С.Кириллова, А.Прокопьева, С.Матвеев, М.Егорова модераторсем ку енĕпе ачасене интереслентерме пĕлеççĕ ĕнтĕ.
3-мĕш «б» класра вĕренекенсем вара çарпа патриот темине хускатса Любовь Андреева ертÿçĕпе пĕрле «Армейский чемоданчик» акципе паллаштарчĕç. Вĕсем хăйсен тăванĕсем службăра тăнă чухнехи япаласене илсе килнĕ. Уйрăмах кĕçĕннисем медальсем илсе килме кăмăл тунă. Виççĕмĕшсем çавăн пекех хăйсен хÿтĕлевçи пирки кĕске истори те каласа пачĕç.
Раççей шкул ачисен юхăмĕн лидерĕ Я.Семкина тата А.Сорокина «Фронтри виç кĕтеслĕ çырăва мĕнле тумалли» ăстаçă урок ирттерчĕç.
Вĕренекенсен шкул хаçатне те тума пĕлмелле-çке. Кун пирки вара «Пурнăç çулĕпе» район хаçачĕн тĕп редакторĕ Марина Леонтьева тата И.Н.Ульянов ячĕллĕ Чăваш патшалăх университетĕнчи журналистика факультечĕн студентки Мария Соколова хĕрачасемпе арçын ачасене туллинех ăнлантарса пачĕç. Калем ăсти пулма кашни вĕренекенех килĕшрĕ.
«Гражданла хастарлăх» ушкăнра та ĕç вĕресе кăна тăчĕ. Воспитани енĕпе ĕçлекен директор çумĕ Марина Данилова хăйсен ирĕкĕпе ырă ĕç тăвасси çинче чарăнса тăчĕ. Ку вара ачана тĕрĕс воспитани парас ĕçре питех те кирлĕ.
Çав вăхăтра Светлана Егорова вожатăй педагогсемпе калаçу ирттерчĕ. Вăл шкулта мĕнле проектсем тата шкул ачисен юхăмĕ пур енлĕ ĕçлени пирки çутатса пачĕ.
Мероприяти «Раççей шкул ачисен юхăмĕн хастарĕ» ал ĕçĕ тунипе вĕçленчĕ. Ку енĕпе Я.Курбатова тата А.Алексеева яваплă пулчĕç. Юлашкинчен ачасем асăннă юхăмăн çĕнĕ флешмобне вĕренчĕç.
Татьяна ГОРДЕЕВА,
район администрацийĕн вĕренÿ пайĕн ертсе пыракан специалист-эксперчĕ.