06 февраля 2018 г.
Хĕлле çил-тăман вĕçтерни йĕркеллĕ пулăм темелле. Анчах та татти-сыпписĕр юр çуни чылай пăтăрмах кăларса тăратать. РФ Чрезвычайлă лару-тăру министерствин Чăваш Енри Управленийĕ вырсарникунпа тунтикун çил-тăманлă çанталăк пулассине кĕсье телефонĕсем çине смс-хыпарсем ярса та çынсене асăрхаттарчĕ-ха. Апла пулин те пĕр чарăнмасăр йĕпе юр çуни çынсем, мĕнпур служба умне йывăрлăхсем кăларса тăратрĕ. Çакна Чăваш Ен Пуçлăхĕ тунтикунсерен ирттерекен планеркăра та палăртнă. Çанталăк условийĕсем япăхланнине пула сиксе тухнă пăтăрмахсене сирме мĕнпур техникăна явăçтармаллине, кирлĕ пулсан ахаль çынсен пулăшăвĕпе те усă курмаллине асăрхаттарнă Михаил Игнатьев. Оперативлă службăсен кăтартăвĕсем тăрăх, юр тата йĕпе юр çунине пула республикăри 12 муниципалитет пĕрлешĕвĕнче çутăпа тивĕçтерессипе чăрмавсем сиксе тухнă.
Февралĕн 4-мĕшĕнче каçхи сакăр сехетсенче Элĕк салинче те вăхăтăн-вăхăтăн çутă сÿнсе илчĕ. Апла пулин те тĕттĕмлĕх тыткăнĕнчех лармарĕç-ха район центрĕнче пурăнакансем. Район администрацийĕн ятарлă программăсен секторĕн заведующийĕ Виктор Осипов пĕлтернĕ тăрăх вара, вырсарникун 19 сехет те 45 минутсенче Пĕрлехи диспетчер службине Ишпарайкка ялĕнче, Шĕмшеш салинче, Пиçенерпе Шураç, Анатри тата Тури Татмăш ялĕсенче пурăнакансем çутă çуккине шăнкăравласа пĕлтернĕ.
Информаци илнĕ хыççăнах МРСК «Волги» организацийĕн районти уйрăмĕн 3 бригади çийĕнчех кăлтăксене сирме вырăнсене тухнă. Асăннă организаци ĕçченĕсем ир тĕлне маларах асăннă ялсене çутăпа тивĕçтернĕ. Февралĕн 5-мĕшĕнче ирхи 6 сехет тĕлне районти Пĕрлехи диспетчер службине Тени тăрăхĕнчи 5 ялта, Урмайра, Кĕçĕн Тăванта та электричество çути çуккине пĕлтерсе шăнкăравсем çитнĕ. 9 сехет те 30 минут тĕлне маларах асăннă ялсенче пурăнакансем те çутăпа усă курма пуçланă.
Çил-тăвăл социаллă пĕлтерĕшлĕ учрежденисен ĕçĕнче те пăтăрмахсем кăларса тăратнă. Районти тĕп больницăн подстанцийĕнче электричество линийĕн кабельне юрăхсăра кăларнă. Сиплев учрежденине саппасра шутланакан генераторсемпе çутăпа тивĕçтернĕ. 11 сехет те 20 минут тĕлне больницăри çутăшăн яваплă «Тепловодоканал» организаци кăлтăксене сирсе электричество çутипе усă курмалла тунă.
Йĕпе юр çунине пула районти çул-йĕр çинче те лару-тăру çивĕчленнĕ. «Вурнарский» районсем хушшинчи çул-йĕр хăрушсăрлăхĕн инспекцийĕ пĕлтернĕ тăрăх, çанталăк условийĕсене пула Элĕк район территорийĕнче автотранспорт кювета сикнĕ тĕслĕхсем темиçе те пулкаланă-ха, вĕсенче никам та суранланман. Çав вăхăтрах водительсемпе çуран çÿрекенсене хăрушсăрлăхпа тивĕçтерсе çулсене юртан тасатассине те районта япăх мар йĕркеленĕ. «Алиководорстрой» организацин начальникĕ Виталий Степанов пĕлтернĕ тăрăх, февралĕн 4-5-мĕшĕсенче район пĕлтерĕшлĕ çул-йĕр çинче 5 КамАЗ, МТЗ икĕ трактор тата «ДТ-75» бульдозер кунĕпе-çĕрĕпе ĕçленĕ. Çил-тăман самантлăха та чарăнманран вырăнăн-вырăнăн çулсем çинче юр хыççăнах лартнă. Республика пĕлтерĕшлĕ автоçулсем çинче те чăрмавсем пулкаланă. Çĕнĕ çултан районти республика пĕлтерĕшлĕ çулсене пăхса тăракан «Дортехсервис» тулли мар яваплă обществăн техникисем те çулсене юртан тасатсах тăнă. Апла пулин те çанталăк та хăйне пăхăнтарас шутпах хыççăнах çулсене тултарнă. Çавна пулах «Шупашкар - Элĕк» пассажирсене турттаракан маршрутсене те улăштарнă.
Хаçата пичете хатĕрленĕ тĕле ялсенчен ытларахăшĕнче вара ку енĕпе лару-тăру çав-çавах çивĕч юлнине шăнкăравласа пĕлтĕмĕр. «Çанталăк черетлĕ хут пирĕн тÿсĕмлĕхе тĕрĕслет-ха. Апла пулин те кун пек мар йывăрлăхсене тивĕçлипе тÿссе ирттернĕ эпир. Çавăнпа та мĕнпур службăпа ведомствăн тĕрлĕ чăрмава çийĕнчех сирме яланах хатĕр пулмалла, Хăйсенчен мĕн килнине пĕтĕмпех тумалла», - палăртнă Чăваш Ен Пуçлăхĕ Михаил Игнатьев министерствăсемпе ведомство, вырăнти хăй тытăмлăх органĕн ертÿçисене ку ыйту çине пысăк тимлĕх уйăрмаллине палăртса.
Эльвира КУЗЬМИНА.