16 февраля 2018 г.
Иртнĕ кунсенче Мăн Ямашри вăтам шкулта студентсемпе тĕлпулу каçĕ иртрĕ. Пĕрремĕш сесси вĕçленнĕ хыççăн аслă вĕренÿ заведенийĕнче вĕренекенсем тăван шкула килчĕç. Шкул пурнăçĕ манăçман-ха, хаваслă самантсем тепĕр хут куç умне тухса тăчĕç. Кăмăлпах кĕтсе илчĕç вĕсене вĕрентекенсемпе вĕренекенсем.
9-мĕш класс ертÿçи Ирина Ильдер чăн малтанах студентсене тĕрлĕ çулсенче вĕренсе тухса кайнă ачасен сăн ÿкерчĕкĕсенчен хатĕрленĕ презентацийĕпе паллаштарчĕ. Студентсемпе аслă классем хушшинче ăс-хакăл вăййи ирттерчĕ. Кунта пур предмета та аса илме тăрăшрĕç. Студентсем те шкул пурнăçне, уроксене куç умне кăларса тăратрĕç. Вăйăра туслăх çĕнтерчĕ.
Вĕренÿ заведенийĕсен тĕрлĕ факультечĕсенче вĕренекенсем хăйсен пурнăçĕпе паллаштарчĕç. Чăваш патшалăх университетĕнче вĕренекен Иван Ильдер технологи факультечĕ пирки хавхалансах каласа пачĕ. Унăн шучĕпе вĕренме интереслĕ. Вĕсем тĕрлĕ ал ĕçĕ тума хăнăхаççĕ. Йывăçран касса кăларасси ăна ытларах килĕшет. Шкулта вĕреннĕ чухнех шашка-шахмата юратаканскер университетра та ку енĕпе палăрса тăрать. Технологи факультетĕнче вĕреннипе пĕрлех ЧППУн истори факультетĕнче те пĕр харăс ĕлкĕрсе пырать тем çинчен те пĕлме ĕмĕтленекен, обществăлла мероприятисене хастар хутшăнакан каччă.
Тĕлпулăва Андрей Михайлов та килнĕ. Вăл программист пулас ĕмĕтлĕ. Вĕренме çăмăлах маррине пĕлтерет. Апла пулин те Андрей спортпа туслине, каçсерен тата канмалли кунсенче юлташĕсемпе пĕрле хулари стадиона чупма çÿренине те пытармасть.
Çакăнтах психологипе педагогика факультетĕнче пĕрремĕш курсра пĕлÿ илекен Валентина Яковлева та студент пурнăçĕ çинчен савăнăçлă кăмăл-туйăмпа каласа кăтартрĕ. Ăна та вĕренме килĕшет иккен. Паянхи кун кунта вĕренме кĕнĕшĕн пачах та ÿкĕнмест Валя.
Ыттисем пекех Светлана Савельевăпа Дина Павловăн та студет пурнăçĕ хаваслă иртет. Вĕсем иккĕшĕ те истори факультетĕнче вĕренеççĕ. Çавăнпа хăйсем вĕренекен факультетне тупăшсах сăнласа пачĕç. Пĕрремĕш курсра пĕлÿ илеççĕ пулин те хăйсен пултарулăхне кăтартма ÿркенмеççĕ хĕрсем, тĕрлĕ секцие çÿресе çан-çурăма çирĕплетеççĕ. Акă Света 12 килограмлă кире пуканĕ йăтассипе ăмăртать, кашни кунах тренировкăсене çÿрет. Хĕрсем «Поиск» кружока çÿресе тĕрлĕ шырав ĕçĕсене хутшăнаççĕ.
Тĕлпулу тулли те тĕрлĕ енлĕ пулчĕ. Студентсем пурте шкулта вĕренекенсене хăйсем патне вĕренме пыма йыхравларĕç. Аслă классенче вĕренекенсем те, педагогсем те чылай ыйту пачĕç. Хыççăн шкул ачисемпе студентсем спортзалта волейболл вылярĕç. Кунта шкулта вĕренекенсем пултаруллăрах пулчĕç.
Анна СТРЕЛКОВА.