Публикации » Фестиваль-конкурсра палăрнă

20 февраля 2018 г.

Февралĕн 17-мĕшĕнче Элĕкри ачасемпе çамрăксен ÿнер шкулĕн «Ладушки» ташă ушкăнĕнчи кĕçĕн ачасем Шупашкар хулинче иртнĕ вокалпа хореографи, театрпа художество тата инструмент пултарулăхĕн «Талантсен калейдоскопĕ» Пĕтĕм тĕнчери 3-мĕш фестиваль-конкурса хутшăнчĕç. 16 ачаран тăракан 1-мĕш класс вĕренекенĕсем сцена çине «Савăнăçлă пăрçасем» ташăпа тухрĕç. Пĕчĕк артистсем жюри членĕсене хăйсен ăсталăхĕпе тыткăнласа иккĕмĕш степеньлĕ диплома тивĕçрĕç. Артемий Алексеев пултарулăхне те пысăка хурса хакларĕç. Унччен те тĕрлĕ конкурсра палăрнă арçын ача ку хутĕнче те 3-мĕш степеньлĕ лауреат пулса тăчĕ. Лилия Ефимова педагогпа унăн вĕренекенĕсем ку çитĕнÿпе çеç çырлахса ларасшăн мар-ха, ытти конкурссене те хутшăнма палăртаççĕ.