20 февраля 2018 г.
Кашни çулах февраль уйăхĕнче Афганистанта çар тивĕçне пурнăçланă ентешĕмĕрсем пĕрле пухăнаççĕ. Вĕсем ку йăлана пăрахăçламанни куç кĕрет. Мини-футбол вылясси те, акă, кăçалхипе вĕсен 10-мĕш хут иртнĕ. Февралĕн 17-мĕшĕнче совет çарĕсене Афганистантан илсе тухнине халалласа интернационалла тивĕçе пурнăçланисем мини-футбол енĕпе уçă турнира черетлĕ хут пуçтарăннă. Ку ырă пуçарăва Элĕк райповĕн Канашĕн Председателĕ, районти депутатсен Пухăвĕн депутачĕ Юрий Харитонов йĕркелесе пырать. Вăлах - тĕп спонсор та.
Турнира хутшăнакансене тата хăнасемпе куракансене район пуçлăхĕ Владислав Волков, Чăвашпотребсоюз Канашĕн председателĕ, Чăваш Республикин Патшалăх Канашĕн депутачĕ Валерий Павлов, Элĕк райповĕн Канашĕн Председателĕ, районти депутатсен Пухăвĕн депутачĕ Юрий Харитонов, Ассакасси ялĕнче çуралса ÿснĕ, Афганистанри çапăçусене хутшăннă çын, икĕ хут Паттăрлăх орденĕн кавалерĕ Владимир Варсонофьев полковник, Муркаш тата Элĕк районĕ- сенчи çар ĕç комиссариачĕн комиссарĕ Владимир Казаков, районти агропромышленность комплексĕн ветеранĕсен пĕрлĕхĕн председателĕ Николай Сергеев, Раççейри Афганистан ветеранĕсен пĕрлĕхĕн районти уйрăмĕн правлени председателĕ Валерий Иванов тата ыттисем те саламланă, çĕршыв тăнăçлăхĕ çирĕп сывлăхлă салтаксенче пулнине палăртнă.
Турнира пĕтĕмпе тăхăр команда хутшăннă. Элĕк райповĕн, Ишпарайкка, Шĕмшеш («Спарта»), Мăн Вылă, çавăн пекех Шупашкар, Тăвай, Вăрнар, Çĕмĕрле районĕсенчен килнĕ хăнасен командисем вăй виçнĕ. Çĕнтерÿçĕ ятне Элĕк райповĕн команди çĕнсе илнĕ.
Чи лайăх вратарь тата тапăнакан ятсене райпо командин футболисчĕсем Алексей Антоновпа Кирилл Иванов, чи лайăх хÿтĕлекен ята вара Ишпарайкка ялĕн командинче вылякан Иван Тарасов тивĕçнĕ.
(Хамăр инф.)