02 марта 2018 г.
Тăвăш Юнтапа ялĕнче пурăнакансем Шупашкара каймасăрах кашни уйăхра чăваш эстрада çăлтăрĕсене курса савăнаççĕ. Илемлĕ концерт курма Тăвăш Юнтапа ялĕнче пурăнакансем кăна мар, юнашар ялсенчен те, сăмахран, Якунекасси, Чулкаç, Чăрăшкасси, Анаткас, Вырăс Сурăм çыннисем хаваспах культура çуртне васкаççĕ. Вĕсем хăйсен вăхăчĕсене шеллемесĕр хапăл тусах клуб умне машинăсемпе çитсе лараççĕ. Куракансен йышĕ çитмĕл çынран кая нихăçан та пулман.
Пĕр-пĕрин хушшинче туслă пурăннине нимĕн те çитмест. Çавăнпах клуб ертÿçи В.Герасимов сĕт паракансемпе тачă çыхăну тытать. Сĕт паракана концерта кайма Александр Захаров, Алексей Николаев, Дмитрий Никифоров тата Федор Захаров сĕт пуçтаракансем тÿлевсĕр билетсем парса хавхалантараççĕ. Кунта пурăнакансене ял тăрăхĕсенчи пултарулăх ушкăнĕсем те килсе хăйсен юрри-ташшипе савăнтараççĕ. Анат Юлăш, Вутлан ялĕсенчи пултарулăх ушкăнĕсене питех те кăмăллă курма. Февралĕн 20-мĕшĕнче Тушкасси ялĕн культура çуртĕнче Юнтапа ял тăрăхĕн пуçлăхĕ Анатолий Ананьев 2017 çулхи отчетпа халăх умĕнче тухса калаçрĕ. Унта район администрацийĕн пуçлăхĕ Александр Куликов та хутшăнчĕ. Пухăва Якунекасси, Чулкаç, Тăвăш Юнтапа ялĕсенче пурăнакансем те килнĕ. Юлашкинчен ял çыннисем концерт курса савăнчĕç. Тăвăш Юнтапа ялĕнчи Александровсем хăйсен пултарулăхĕпе тĕлĕнтерчĕç. Юрра-ташша питĕ ăста вĕсем. Çавна май куракансем те тăвăллăн алă çупрĕç. Алинăпа Иван Александровсен ачисем ĕçре те, юрă-ташăра та, вĕренÿре те маттур. Концерт вĕçĕнче Анатолий Ананьев пултаруллă çемьене Хисеп хучĕ парса чысларĕ. В.Герасимов клуб ертÿçи хăй ятĕнчен пысăк картина парнелесе тав сăмахĕ каларĕ. Çапла вара Тăвăш Юнтапа ялĕнче пурăнакансен кулянса ларма вăхăт та çук. Уявран уява, концертран концерта çÿресе хăйсен кăмăлĕсене çĕклеççĕ.
Лидия ЕГОРОВА,
Тушкасси ялĕ.