16 марта 2018 г.
Çулсеренех Элĕкри «Хĕлхем» спорт комплексĕнче Чăваш Республикин Шалти ĕçсен министерствин СОБР оперуполномоченнăйне, милици лейтенантне, пирĕн ентеше Изосим Башкирова асăнса йĕркеленĕ бокс ăмăртăвĕ иртет. Кăçал та Изосимăн тус-юлташĕ, пĕрле службăра тăнисем пулăшнипе ăна 4-мĕш хут йĕркеленĕ. Çавăн пекех асăннă турнира СОБР отрячĕ 25 çул тултарнине те халалланă.
Аса илтерер - Изосим Васильевич Атмалкасси ялĕнче çуралнă. Çар служби хыççăн вăл Шалти ĕçсен органне кĕнĕ. 1996 çулта çамрăк Чечен Республикинчи Грознăй хулинче пĕрлештернĕ СОБР отрячĕпе пĕрле саккуна хÿтĕлес тата йĕркелĕхе сыхлас ĕçре паттăрла çапăçса пуçне хунă. Службăри тивĕçне пурнăçланă чухне хăюлăх кăтартнăшăн ăна вилнĕ хыççăн «Паттăрлăх» орденĕпе чысланă.
Турнирта Элĕк район боксерĕсемпе Шупашкар хулин командисем кĕрешрĕç. Пурĕ 36 боксер хутшăнчĕ. Вĕсене тĕрлĕ хуласенчен килнĕ 9 судья тĕрĕслерĕ. Мĕнпур вăйне кăларма тиврĕ кĕрешÿсенче ачасен. Çапла майпа, турнир пĕтĕмлетĕвĕ тăрăх, çĕнтерÿçĕсен картлашки çине Арсений Архипов, Роман Романов, Михаил Киселев, Сергей Александров, Дмитрий Каратаев, Кирилл Казаков, Андриян Андреев, Эдуард Маслов, Кирилл Николаев, Никита Алексеев, Даниэль Семенов хăпарса тăма пултарчĕç. Чи юлашкинчен вара хĕрсем ринга тухни пысăк мухтав вырăннех пулчĕ. Пирĕн командăри Настя Мурзакова Шупашкарти бокс пикипе кĕрешсе пĕрремĕш вырăн çĕнсе илчĕ. Сăмах май, Настьăна çак сумлă мероприятире спорт мастерĕн кандидачĕн нормативне пурнăçланине çирĕплетекен документ пачĕç. Çĕнтерÿçĕсемпе призерсене кубоксемпе медальсем тата Хисеп хучĕсем парса чысларĕç.
Мероприятире ОМОН ятарлă отрядăн боецĕсем ал вĕççĕн ирĕклĕн кĕрешмелли тата хÿтĕленмелли мелсене кăтартрĕç.
А.СИЛИВЕСТРОВА.