20 марта 2018 г.
Кăçалхи февралĕн 17-мĕшĕнчен пуçласа мартăн 18-мĕшĕччен Шупашкарта «Талантсен калейдоскопĕ» вокалпа хореографи, театрпа илемлĕх тата инструмент пултарулăхĕн Пĕтĕм тĕнчери 3-мĕш фестиваль-конкурсĕ иртнĕ.
Унта Чăваш, Тутар, Мари Эл Республикисенчи районсемпе хуласенчен килнĕ 1000 ытла çын хăйĕн пултарулăхне кăтартнă. Фестиваль-конкурса Мускав хулинчен килнĕ «Тĕнчери халăхсен ташă ансамблĕ» те пурне те савăнăç кÿнĕ. Пирĕн Чăваш Енрен 120 ытла коллектив хутшăннине палăртма кăмăллă.
Фестиваль-конкурсран Элĕк ен те аякра юлман. Чăваш Республикин культурин тава тивĕçлĕ ĕçченĕ Любовь Константинова «Илемлĕ сăмах» номинацире тупăшнă. Вăл А.Геслерăн «Амăшĕ каланă» сăвва питĕ лайăх вуланă. Любовь Михайловна 1 степеньлĕ лауреат пулса тăнă.
4-5 çултисем хушшинче «Хĕвел» ача садне çÿрекен Евгения Леонтьева хутшăннă. 5-ри хĕрача «Тухтăр» сăвва жюри членĕсене тыткăнламалла вуласа панă. Хăйĕн ÿсĕмрисем, 10 ытла ача хушшинче, вăл 1-мĕш степеньлĕ лауреат пулса тăнă. Çавăн пекех унăн Ульяна аппăшĕ те сцена çинче Александр Кăлканăн «Йытăпа кушак» сăввине вуланă. Элĕкри вăтам шкулта 1-мĕш класра вĕренекен хĕрача 6-7 çултисем хушшинче сăвва илемлĕ вулассипе палăрнă. Ăна та 1-мĕш степеньлĕ лауреат пулнине палăртса дипломпа чысланă. Асăннă конкурса Хусан, Мускав тата ытти пысăк хуласенчи, Мари Элти ачасем те хутшăннă. Анчах та вĕсем хушшинче чăвашла вулакансем пулман.